[Ü2 27a] Adana ve Tarsus Mütesellimliği ber-muktezây-ı hâl bundan akdem Çapân-zâde Süleymân Bey'e tefvîz olunup, tarafından Mütesellim irsâl eylemişidi. Esfâr takrîbi ile Adana'da birkaç sene Mütesellim ve fi'l-cümle kuvvet kesbiyle müteʿazzım bulunan Karcı-oğlu, kârı kâsid ve maslahatı fâsid olacağını cezm ve zuʿmunca riʿâyet-i şart-ı hazm edüp, Tarsus Mütesellimi ile müttehid ü yek-dil ve tertîb eyledikleri meclis-i şekāvetde idare-i [Ü1 26b] hazef-pâre-i mey-i ʿisyân ile mest-i lâ-yaʿkıl olmalarıyla, fi'l-hâl îkād-ı nâ'ire-i fesâd ve Adana ve Tarsus mütesellimlerini tard u ibʿâd ve sûret-i hakdan gelerek teʿaddîyi o tarafa isnâd etmişler idi. Zâhir-i hâle nazaran Çapân-zâde'nin bi'n-nefs me'mûriyyeti ile nizâm-ı beldeye ihtimâm lâzım gelmiş ise dahi, bu sebeble mücrim ve gayr-i mücrim kati çok kimsenin rişte-i ʿömrü güsiste vü munsarım olacağı mübeyyen ve bu ihtilâlin indifâʿı, tedbîr-i hafi ile vücûd-yâb olması ahsen görülüp, Adana Eyâleti, İç-il Sancağı'na mutasarrıf olan Mîr-i mîrân Yûsuf Paşa'ya tevcîh olunup, Adana'ya vusûlünde irâde-i devlet üzere eşkıyây-ı mezkûreyi fî-bâdiyyi'l-emr te'lîf ve şübheden vâreste edecek derecelerde taltîf edüp, emniyyet-i tâm husûlünden sonra merkūm Karcı-oğlu'nu ve ʿavenelerinden baʿzısını katl ü iʿdâm ve Çapân-zâde dahi Tor-oğlu'nu basup, ahz-ı intikām eylediği haberi, ru'ûs-i maktûʿalarıyla resân-ı Âsitâne-i râstân olup, sâye-i Pâdişâhî'de belde-i mezkûre ihtilâlden masûn ve zulm ü cevr-i erbâb-ı gadr ile zebûn olan fukarâ vü zuʿâfâ nâyil-i râhat ü sükûn oldu.