İşbu Şevvâlü'l-mükerremin dördüncü günü kāʿide-i Devlet-i ebed-müddet üzere tevcîhât vukūʿ bulup, hademe-i Bâb-ı âlî bi'l-cümle ibkā ve Kethudâ Kitâbeti ile fekat Kethudâ Bey dâmâdı Sâdık Efendi kâm-revâ oldu. Şıkk-ı Evvel Defterdârı kemâ-kân merkezinde kāyim ve Sânî ve Sâlis mûmâ ileyhe mukarrer ile mülâzım olup, Doğramacı-zâde ʿAbdullah Efendi'nin mansıb-ı refîʿ-i Tevkīʿ ile târem-i ikbâli teşyîd, Defter Emâneti ile Râsih Efendi'nin kayd-ı ʿatîk-i berât-ı emeli tecdîd olunup, Rûznâmçe-i Evvel mansıbı Şerîf Efendi'ye ibkā ve Baş-muhâsebe ile Sultân Kethudâsı İbrâhîm Efendi'nin derece-i kadri iʿlâ olundu. Sâyir menâsıb dahi vech-i münâsib üzere erbâbına tefvîz ve baʿzı hâcegâna mansıba bedel nakd-i muʿaccel [Ü2 22a] taʿvîz olundu. Yevm-i mezkûrda vüzerây-ı ʿizâm tevcîhâtı dahi vukūʿ bulup, Mora Eyâleti, Bender Muhâfızı Vezîr Hasan Paşa'ya ilhâk ve Eğriboz Sancağı'yla selefi Vezîr Mustafa Paşa mazhar-ı işfâk kılınup, Selânik Sancağı, Vezîr Ferhâd Paşa'ya ihsân ve münhall olan [Ü1 21b] Silistre Eyâleti ile Çirmen Mutasarrıfı ʿAbdî Paşa cezlân ve Diyârbekir Eyâleti, Hotin Muhâfızı Vezîr Ebûbekir Paşa hazretlerine munzamm ve sâ'ir vüzerây-ı ʿizâm hazerâtının esbâb-ı huzûr u râhatları revâbıt-ı ibkā vü makarr ile muhkem kılındı.