Bundan akdem ittifâk-ârâ ile düvel-i Nasârâ'ya [Ü1 20b] birer ikāmet elçisi gönderilmek tasvîb olunduğuna binâ'en, hâcegân-ı Dîvân-ı hümâyûn'dan Yûsuf Âgâh Efendi, Nâme-i hümâyûn ve hedâyây-ı mülâtefet-makrûn ile İngiltere tarafına tesrîb olunmuşidi. Mûmâ ileyh berren ve ahmâl ve eskāli bahran seyr ü hareket eyleyerek makarr-ı Kıral olan Londra Şehri'ne vâsıl ve şehre bir sâʿat mesâfede vâkiʿ Celsi (Chelsea) nâm serâyda resm-i ziyâfet icrâ olunmak musammem olduğuna binâ'en, serây-ı mezkûra nâzil ve o gice şart-ı mihmân-nüvâzı îfâ ve mülâkātdan bir gün evvel hedâyânın baʿzısı Kıral Serâyı'na irsâl olunmasının evleviyyeti o tarafdan inbâ olunmağla, boğçalara taʿbiye olunmuş akmişe-i reng-â-reng ve mücevher sorguç ve kahve ferdeleri tercemân vâsıtasıyla Kıral tarafına irsâl ve ʿale's-sabâh kezâlik hedâyây-ı Mülûkâne'den olan müzeyyen esbler dahi o tarafa îsâl olunup, resm-i alay tertîbi dahi âmâde olmağla, mûmâ ileyh Sır Kâtibi'ni ve Tercemânı'nı başka başka ʿarabalar ile maʿiyyetine istishâb ve Feldmerşâl'in olduğu mahalle tahrîk-i rikâb edüp, hâric ü dâhil-i serâyda süvârî vü piyâde saff-beste vü kıyâm ve tabl u sûrnâlarını darb ile resm-i terhîb ve hûş-âyendegîyi itmâm ve baʿdehû zikr olunan serâya nüzûl ü ilmâm olunup, Feldmerşâl ve o kavmin vücûhu mûmâ ileyhi istikbâl ve vazîfe-i ikrâm ü ihtirâmı ikmâl etdikden sonra, tenâvül-i taʿâm ve idâre-i kelâm hıtâm bulup, mukaddem ihzâr olunan hediyye atları pîşgâhına alup, müzeyyen hintolar ile Kıral'ın olduğu serâya ʿazîmet ve temâşâ içün ictimâʿ eden ecnâs-ı nâs kesretinden mübtelây-ı meşakkat [Ü2 21b] olarak cenb-i kâşâne-i Kıral'da vâkiʿ bir odada ihtiyâr-ı celse-i râhat kılınup, baʿdehû Kıral'ın olduğu hâneye teveccüh olundukda, Kıral bir müzeyyen sandalîde kuʿûd ve pîş ü pesinde erkân-ı devleti ve sâ'ir düvel elçileri mevcûd olup, mûmâ ileyh dahi Nâme-i hümâyûn'u başına berâber tutarak Kıral'a doğru teveccüh gösterüp, [Ü1 21a] Kıral, Nâme-i hümâyûn'a hürmet ile yerinden hareket eyledikde, mûmâ ileyh Nâme-i hümâyûn'u teslîm ve İngiltere devleti hakkında safvet ve teveccüh-i Devlet-i ʿaliyye'yi ifade vü tefhîm edüp, Kıral dahi bu ifâdeyi hakīkate haml ile izhâr-ı memnûniyyet ve kesb-i neşât u meserret edüp, bundan sonra ʿavdet ve Kıraliçe ile sohbet olunup, kendüsine ve büyük kızına lutfen ihdâ olunan mücevher sorguçlardan kemâl-i mahzûziyyet ü iftihâr hâsıl olduğunu işʿâr edüp, resm-i mülâkāt bu vechile resîde-i hayyiz-i gāyât olduğunu mufassal tahrîrâtıyla mûmâ ileyh ifade etmekle, ber-vech-i ihtisâr kayd-ı mecelle-i âsâr kılındı.