Tersâne-i ʿâmire'de ve sâ'ir sevâhil-i İslâmiyye'de inşâ olunan sefâyinin sanʿatında kemâl-i hazâkat henûz tekarrur etmediğinden, itmâm olunan sefîne deryâya nüzûl eyler iken, şîr-i sefîneye dek gavs vâkiʿ olup, bu sebeble sıklet-i pâ, sere intikāl ve kable'l-istiʿmâl sefîneye vehn ü halel ʿârız olduğu vâreste-i kayd-ı istidlâl olup, Frenk mühendislerinden “Brun” nâm Bey-zâde iʿmâl olunan sefîne kable'l-itmâm deryâya tenzîl ve baʿdehû tekmîl olunursa, bu mahzûr ber-taraf olacağını iddiʿâ ve bir sefîne inşâsını ilticâ etmişidi. İddiʿâsı medâr-ı ʿakla muvâfık ve nefsü'l-emre mutâbık görüldüğünden, elli dokuz zirâʿ bir sefîne inşâsına ruhsat verilüp, ol dahi teʿahhüdü üzere binâsına mübâşeret ve bu esnâda emr-i binâ teʿayyün eylediği merkeze resâ olduğunu inhâ etmekle, yevm-i muhtâr gurre-i Ramazân'a tesâdüf etmişiken niyyetden ʿudûl olunmayup, ʿale's-seher Pâdişâh-ı bahr ü berr [Ü2 20b] Tersâne'yi kudûm-i meyâmin-lüzûmlarıyla nümûne-nümây-ı fülk-i ahzar buyurup, Sadrıaʿzam [Ü1 20a] ve Şeyhülislâm hâzır oldukları hâlde sefîne-i nâ-temâm basît-i deryâya sühûletle hırâm edüp, mesfûrun iddiʿâsı gayr-i vâhî ve fîmâ-baʿd bu sûret düstûru'l-ʿamel tutulmak murâd-ı hazret-i Pâdişâhî olmağla, irâde-i kātıʿa me'mûrlara ifhâm ve ilbâsı muʿtâd olanlara ʿalâ ihtilâf-ı tabakātihim hilʿa-i fâhire ile ikrâm olunup, mesfûr dahi mazhar-ı inʿâm-ı Şehriyâr-ı enâm oldu.