Şerbetci dâmâdı Mehmed Emîn Efendi, hacca ʿazîmet eder iken Mısr-ı Kāhire'de [Ü2 20a] Vezîr ʿİzzet Mehmed Paşa'yı Vâlî bulup, müşârun ileyh ile kerem-i ülfet ve müddet-i ikāmetinde hem-sohbet olup, zemân müsâʿid [Ü1 19b] olursa, husûl-i ümniyyesiyle mesrûr kılınmak muʿâhedesi dahi miyânelerinde sebkat etmişidi. Ber-muktezây-ı takdîr müşârun ileyh câh-ı vâlâ-yı Sadâret'le tevkīr olundukda, îfây-ı ʿahd ve incâz-ı vaʿd sûretinde mûmâ ileyhi Defterdâr etmek niyyetini kalbinde izmâr etmişidi. ʿOsmân Efendi'nin umûr-ı istîfâda kusûrunu ve serhadler ahvâlini idârede kemâl-i bütû vü fütûrunu ʿillet eyleyerek ʿazlini telhîs ve Emin Efendi'yi Defterdarlığ'a tahsîs edüp, telhîsi, makrûn-ı müsâʿade-i Şehriyâr-ı melekiyyü'l-hısâl olup, ʿOsmân Efendi pâ-fişürde-i girîve-i infisâl ve işbu Şaʿbân-ı şerîf'in yirmi yedinci günü Şerbetci dâmâdı kand hıdmet-i istîfâ ile şîrîn-sâz-ı mezâk-ı âmâl oldu.