Uşak Voyvodası olup, zulm ü teʿaddîsine binâ'en istîsâline irâde teʿalluk eden ʿAcem-oğlu'nun ahvâli cild-i evvel'de tafsîl ve üzerine me'mûrların keyfiyyeti tatvîl olunmuşidi. Merkūm gāyileyi ber-taraf edüp, o havâlîyi keyfe-mâ-yeşâ'u ve yehtâr tasarruf ve bâğīyâne reftâr ile izhâr-ı nahvet ü tesallüf edüp, medâr-ı necât ve sebeb-i hayât ittihâz eylediği kullesini taʿmîr ve kemâ-kân sît-i bagy u ʿısyânı teşhîr eyledi. Merkūmun cinâyeti ʿafv olunur kabîlden olmayup, tedmîri lâzım u matlûb olduğundan, Kara ʿOsmân-zâde bu emr-i ehemme me'mûr ve tarafına irsâl-i menşûr kılınup, bi-hasebi'l-me'mûriyye üzerine nehzat ve kullesini hasr u tazyîka mübâderet edüp, müddet-i muhâsara mümtedd ve merkūmun ıztırâbı müştedd olup, encâm-ı kâr firâr ve Nasûh-oğlu dâmına giriftâr olup, fi'l-hâl seri bedeninden cüdâ ve Kara ʿOsmân-oğlu tarafına ve andan Âsitâne'ye isrâ olunup, selh-i şehr-i Receb'de vâsıl ve meydân-ı siyasete ilkā ile sebeb-i haşyet-i erâzil oldu.