Vaktâ ki, Mîr-i mîrânlık ile Rakka Eyâleti Süleymân Ağa'ya tevcîh olunduğunun haberi Bağdâd Vâlîsi'nin semʿini karʿ eyledi, bu hâlet vukūʿundan garaz ne olduğun idrâk ile dâmen-i sabr u tehammülü çâk-çâk olup, fi'l-hâl Devlet-i ʿaliyye'ye ilticâ ve bu kazıyye hudûsundan erâcîf ü ekâzîb peyda olduğunu inhâ ile mûmâ ileyhin ʿazl ü nefyini istidʿâ edüp, ber-muktezây-ı vakt ü hâl recâsına müsâʿade ve Rakka Eyâleti'nden mûmâ ileyh ʿazl ve bi-tarîkı'n-nefy Kıbrıs Cezîresi'ne firistâde olundu. Müşârun ileyh bununla teşeffî-yi gayz edemeyüp, ihtilâl-i ʿIrâk'ın defʿi ve erâcîf-i ehl-i nifâkın refʿi, mûmâ ileyhin ihzârına mevkūf olduğunu merreten-baʿde-uhrâ tahrîr ü niyâz ve her ne kadar bu istidʿâsı bâyeste-i ruhsat u cevâz değil ise dahi, müşârun ileyhin vaktinde serhadd-i Bağdâd âsûde ve sükkânı pister-i emn ü râhatda gunûde olup, ser-keşân-ı ʿArab bagy ü fesâd izhârından ʿâciz ve tetâvül-i dest-i a'dâya siper-i ʿadl ve hüsn-i siyâseti hâciz olduğundan, mes'ûlü netîce-bahş-ı husûl ve istihsâl-i safvet-i memleket zımnında îrâd eylediği aʿzâr karîn-i kabûl olup, izhâk-ı rûh ve ihrâk-ı dem vukūʿundan dâmen-keş-i mücânebet olmak şartıyla mûmâ ileyh Kıbrıs'dan kaldırılup, mübâşir ile [Ü2 15a] Bağdâd'a [Ü1 14b] îsâl ve mûmâ ileyhi vechen mine'l-vücûh rencîde etmeyüp, ısgāy-ı misâl-i lâzimü'l-imtisâl eyledi.