Hazâkat-ı tabâbetde sânî-yi Bukrât ve ʿilm-i havâss-ı eşyâda müdânî-yi Sokrât olan Hâfız Hayrullah Efendi, nısf-ı Receb'de bi'l-fiʿl Sadr-ı Rûm olup, kayd-ı pâyeden vâreste vü müstagnî iken, Sarı Mehmed Paşa-zâde İbrâhîm Beyefendi bu esnâda tavr-ı ikbâle tevakkul ile Rumeli Pâyesi'n tahsîl ve müşârun ileyhe sebkat dâʿiyesin teʾmîl edüp, muhâfaza-i kāʿide-i tarîk-ı resmî hükmünce Hayrullah Efendi'ye mukaddem târîh ile pâye verilüp, sâbık u mesbûk tefrîk ve rütbeteyn-i mezkûreyn tefâvüt-i muʿayyene ile isbât u tahkīk olundu. İstanbul Pâyesi olan Müftî-zâde el-hâletü hâzihî beldenin aʿlemi ve min-ciheti's-sinn cümlenin akdemi olup, ʿilmine hürmet ve zâtına iʿtibâr u mahabbet lâzım-ı şart-ı diyânet olup, agyârın nâ'il olduğu imtiyâzdan hisse-mend olmaması revâ görülmeyüp, târîh-i mezkûrda Anadolu Pâyesi'yle müşârun ileyhin kadri terfîʿ ve maksûdun bizzât olan arpalığı tebdîliyle dâ'ire-i maʿîşeti tevsîʿ olundu.