Bağdâd Vâlîsi tarafından birkaç defʿa Âsitâne'ye hedâya ile vürûd ve mecâlis-i kibâra duhûl ile isbât-ı vücûd eden Enderûn Çukadârı Süleymân Ağa ʿazbü'l-lisân bir merd-i fettân olup, kelimât-ı sihr-âmîziyle sayd-ı kulûb-ı nâs ve şâhid-i Vezâret ü emârete gûnâ-gûn libâs ilbâsıyla ʿarz-ı mâhiyyet ve ibrâz-ı tavr-ı liyâkat eylediğinden gayri, mahdûmu olan Vezîr Süleymân Paşa sâl-hûrde ve pîr-i fânî ve çâr-bâliş-nişîn-i minassa-i nâ-tüvânî olup, bâ-husûs bu esnâda vücûdunda verem peydâ ve ʿilletin ictimâʿiyle fî-akrebi'z-zemân ʿazim-i semt-i fenâ olacağını inbâ ve bu sebeble kutr-ı vesîʿ-i Bağdâd berhem-zede-i ihtilâl ü fesâd ve ʿaşâyir-i ʿUrbân ve kabâ'il-i Ekrâd hılv-ı mâniʿ ile tahrîb-i bilâd ve taʿzîb-i ʿibâd eyleyeceklerini bast ile Bağdâd Vâlîliği'ne istiʿdâd gelmek içün Bağdâd'a mücâvereti olan Rakka Eyâleti vehle-i ûlâda tarafına tevcîh ve baʿdehû mahlûliyyet-i hakīkıyye vukūʿunda maʿa'l-mülhakāt Eyâlet-i Bağdâd ile ber-murâd kılınır ise Devlet-i ʿaliyye'ye muʿaccelen ve mü'eccelen envâʿ-ı hidemât ibrâz ve Bağdâd Hazînesi'nden beher sâl irsâliyye ifrâz eyleyeceğini lâzım gelan mahallere neşr ü iʿlân etmişidi. Bu mukaddimât her ne kadar hakka şebîh mugālata nevʿinden olduğu müstebân ise dahi, emzice vü tabâyiʿ-i erbâb-ı hall ü ʿakde muvâfık düşüp ve ʿan-asl zabt-ı Bağdâd, [Ü1 14a] Rum vüzerâsına “Esʿabu min hartı'l-katâd" olup, [Ü2 14b] o havâlîde neşv ü nemâ bulmuş akviyây-ı memâlîke inhisâr-ı iʿtikādı dahi nüfûsda istikrar bulduğundan, iltimâsı hayyiz-i müsâʿadeye makrûn ve o esnâda Rakka Vâlîsi'nin emvâl-i mîrî irsâlinde ve havâlât-ı istîfâsında ru'ûneti işâʿa olunmuş olmağla, evvelîn-i Pâye-i Vezâret olan Rütbe-i Mîr-i mîrânî ile Rakka Eyâleti mûmâ ileyhe şurût-ı mukarreresiyle tevcîh ü ihsân ve selefi Mustafa Paşa'nın Vezâret'i refʿiyle maskat-ı re’si olan Divrigi'de ikāmeti fermân olundu.