Mesârıfât-ı mukarrere-i Devlet-i ʿaliyye'ye ʿale'l-infirâd mukābele ile îrâdât-ı muʿayyene vazʿ u takdîr olunup, baʿzı esbâb u zuhûrât ile ahad-i tarafeyne naks ü tedennî tareyân ederse dahi, tasarrufât-ı erbâb-ı istîfâ ile nizâm ve mâl-ı âhar ile taʿvîz ü iltiyâm mecârî-yi umûr-ı Devlet-i ebed-kıyâm'dan olup, ancak zâhirde zevâyid-i mesârıf ve hakīkatde mahz-ı sadakāt ü ʿavârif olan, mevkūf ve ʿatıyyenin ʿan-asl mevridi maʿlûm ise dahi, bi-hasebi'l-iktizā kālib-i âhara ifrâğ olunduğu günden ilâ-yevminâ hâzâ mahalli maʿdûm ve zemân-ı iʿtâsı ʿakīb-i mevâcib-i kısteyne tesadüf etmekden nâşî, vaktiyle tedârük ve yerlü yerine teslîmi müstevfiyân-ı vakti muztarib ü mağmûm edüp, ketebe-i aklâm ve sâʾir hademe-i Devlet-i ebediyyü'd-devâm ise Ramazân ve tevcîhât ʿakabinde ʿatâyâ ve mevkūfu ahz ü kabza meʾlûf ve ekserinin medâr-ı meʿâşları bu tertîbât-ı muʿayyeneye vâbeste vü mevkūf olup, tehallüf-i zemân ü vakt cümlesini üftâde-i girdâb-ı zarûret ü makt eyleyeceğini, Defterdar-ı Şıkk-ı Evvel olan Moralı-zâde ʿOsmân Efendi nakş-ı zamîr ve bir çâresi görülmek bâbında ihtirâʿ-ı tedbîr vâdîsine peyk-i ʿakl-i meʿâşı tesyîr edüp, encâm-ı kâr Îrâd-ı Cedîd tarafından bedel-i muʿaccelât olarak beher mâh Hazîne-i ʿâmire'ye verilegelan otuz dokuz bin üç yüz kırk üç buçuk guruşun Receb [Ü1 13b] ve Şaʿbân ve Ramazân [Ü2 14a] ve Şevval aylıkları Îrâd-ı Cedîd Hazînesi'nde ber-vech-i emânet iddihâr olunup, mevsimeyn-i mezkûreynde celb ve erbâbına tevzîʿ ü teslîm olunmak üzere Bâb-ı ʿâlî'ye mahsûs takrîr takdîm etmekle, takrîri Rikâb-ı hümâyûn'a lede'l-ʿarz müsâʿade-i menâyih-ifâde-i hazret-i Tâc-dârî'ye makrûn ve bu ʿinâyet-i bî-gāyete hamyâze-keş-i intizâr olanlar ferden ferdâ mesrûr u memnûn oldu.