Efendi-i mûmâ ileyh subbet sicâlu'r-rahmeti ʿaleyh Trabzon sükkânından [Ü1 9b] olup, ʿunfuvân-ı civânîde tafsîl-i müfredât-ı dünyâya sûret-i muhâsebe-i icmâl olan şehr-i dilârâ-yı İstanbul'a vusûl ve medreseye duhûl ile tahsîl-i ʿulûma meşgûl olup, Halebî İbrâhîm Efendi'den fünûn-ı edebiyyeyi ahz ü telakkī ve gün-be-gün şöhret-i hiddet-i zekâ vü fitnatı kesb-i terakkī edüp, Sıdkī Efendi tarafından istishâb olunarak [Ü2 10a] vâreste-i kayd-ı zarûret ü ıztırâb olup, baʿdehû Riyâset'den nâ'il-i Vezâret olan Tevkīʿî Mehmed Emîn Paşa'ya Kâtib-i Dîvân ve Sadâret'i vaktinde Selâm Ağalığı'yla sefere revân olup, Babadağı'nda Resmî merhûmun hüsn-i terbiyesiyle Vakʿa-nüvîs ve muharrir-i ahvâl-i herem-i ru'ûs u re'îs olmuşidi. Baʿdehû Teşrîfâtî ve Cebeciler Kâtibi ve Ordu-yi hümâyûn Âsitâne'ye geldikde, tekrâr Teşrîfâtî ve Tezkireci ve birkaç defʿa Anadolu Muhâsebeciliği ile imrâr-ı evkāt ve târîh-i mezkûrda vefât eyledi. Mûmâ ileyhin kadr-i müşterek, şiʿr ü inşâsı ve fünûn-ı sâ'irede yed-i tûlâsı olup, siniyy-i ʿömrü müntehiz-i aʿdâd-ı sittîn bir merd-i sâhib-i yakīn idi.