Birkaç gün mukaddem Çavuş-başılık ile pâ-nihâde-i süllem-i iʿtibâr ve hakkında Vezâret izmâr olunan Selânikî Mustafa Bey'de Vezâret'e kābiliyyet ü istiʿdâd derkâr ve bâ-husûs Rumeli'nin merdüm-zâdelerinden olmağla, lâzime-i hükûmet olan îkāʿ-ı tehdîdât ve defʿ-i fesâdâta iktidârı zâhir ü beyyin ve o havâlînin ihtilâl ü şûrişini kuvve-i fikret-i sahîha ile izâleye yârâ vü mikneti müteʿayyin olduğuna binâʾen, şehr-i mezkûrun yirminci günü eʿazz-i merâtib-i devlet olan Rütbe-i Vezâret ile kadri terfîʿ ü iʿlâ ve Eyâlet-i Rumeli menşûru dahi yed-i emânetine iʿtâ olundu. Münhall olan [Ü1 10a] Çavuş-başılık ile ʿakl ü dirâyeti müsellem-i erbâb-ı tedkīk olan ʿÖmer Paşa-zâde ʿAbdullah Beyefendi mesrûr ve Baş-bâkī Kulluğu ile Bostâncı-başı-yı esbak Ahmed Ağa nâ'il-i irtiyâh u hubûr olup, sâbıkā Rumeli Vâlîsi Vezîr Ebûbekir Paşa hazretleri Hotin muhâfazasına taʿyîn ve Silistre Eyâleti'yle Vezîr Ferhâd Paşa'nın kitâbe-i kasr-ı şîrîn âmâli tezyîn olundu.