Mîr-i mûmâ ileyh bundan akdem kal‘a-i mezkûrenin binâsına me'mûr olmakdan nâşî, resm ü keşf olunduğu vech üzere vaz‘-ı bünyâd ve tarh-ı ıdlâ' u evtâd edüp, yâverî-yi baht-ı bâhirü'l-esʻâd ve nîrû-yi himmet-i Şehriyâr-ı vâlâ-nejâd ile emr-i binâ kuvve-i karîbeye mevsûl ve bu sâl-i ferruh-fâlde itmâmı muntazır u me'mûl iken, mûmâ ileyhin esvâr-ı üstüvâr-ı maʻkıl-ı ‘ömrü harâb-kerde-i tîșe-i hâdimü'l-lezzât olduğu haberi işbu Zilka‘de'nin evâhırında resîde-i sâmiʻa-i devlet olup, tekmîl-i kusûr ve tetmîm-i küsûr zımnında hademe-i devletten bir şahs-ı kâr-güzâr meʼmûr olmak lazım gelmişidi. Binâ-berîn sâbıkā Cebeciler Kâtibi Eginli Mustafâ Efendi'de maʻnâ-yı liyâkat ve mezâyâ-yı reviyyet fehm olunup, ilbâs-ı hilʻat içün Bâb-ı ‘âlî'ye ihzâr ve sûret-i me'mûriyyeti ihbâr olundukda, baʻzı mülâhazât-ı vâhiye ile izhâr-ı gılzat ve sarf-ı meʼmûriyyet zımnında ihtiyâr-ı envâ‘-1 ‘ukûbet edüp, kâfil-i umûr-ı devlet olan zevât-ı kirâm izâle-i zunûn u evhâm ve terfî‘-i kadr ü şân ile kâffe-i matlûbâtına müsâʻade olunacağını ifhâm etmişler iken, [mısra]: Derûn-1 tîre dilân kābil-i nasîhat nîst. mefhûmu üzere pend-pezîr olmadığı hâk-i kadem-i hazret-i Tâcdârî'ye ‘arz olundukda, huddâm-ı dergâh-ı Pâdişâhî'den olup, iltifât-ı devlet ile bâlâ-rev-i vâdî-yi teʻayyün ü şöhret ve sâye-i Saltanat-ı ‘uzmâda nâyil-i bülga-i servet olanların bu makūle hıdemât-ı mühimmeden rû-tâb-ı istinkâf olmaları resm-i edeb ü ‘ubûdiyyete mahall olup, takrîr u te'dîbe müste’hil olmalarıyla fi'l-hâl mûmâ ileyh Mağusa Kalası'na nefy ü izlâl olundu. Sâbıkā Sipâh Kâtibi Râşid Efendi ikāle-i ‘asrat ve izâle-i gubâr-ı nefret ümniyyesiyle bu hıdmet-i şeref-bahşın rü'yetine taleb-kâr ve şiddet-i şevk ü hâhişi hüsn-i terbiye ile hâk-pâ-yi hazret-i Şehriyârî'ye 'arz u işʻâr olundukda, [218a] Emânet-i Binâ el-yevm İsmaʻîl taraflarında beste-miyân-ı hıdmet olan Mu'ammer Ağa'ya ihâle olunup, Efendi-yi mümâ ileyhin nezâret-i mücerrede ile iktifâsı vehle-i ûlâda irâde olunmuşiken, müteveffâ Nuʻmân Bey'in me'mûriyyet-i mürettebesi üzere taʻyîn olunmak ilticâsında olduğu tekrâr 'arz-ı Der-bâr-ı ‘atûfet-medâr kılınup, ol vechile me'mûriyyeti muvâfık-ı re'y-i Sâmî olmağla, der-‘akab da‘vet ve Baş-muhasebe Pâyesi'yle ilbâs-ı hilʻat ve birkaç gün zarfında tedârükünü görüp, izhâr-ı memnuniyyet eyleyerek İsmaʻîl cânibine ‘azîmet eyledi. Kalʻa-i mezkûrenin ‘amele vü edevâtı müheyyâ ve lâzım gelan mesârifi mîrî tarafından 'an-nakdin i‘tâ olunageldiğinden fazla hatb-ı binâya teferru' eden umûr min-külli'l-vücûh heyyin ü yesîr ve tahsîs olununan meʻâş müstevfâ vü kesîr olup, nezâret ü ikdâmdan gayri maslahat, sadakat ü istikāmetten gayri hıdmet kalmadığı ve sedd-i İslâm ve sadd-ı gezend-i aʻdâ-yı li’âm maʻrazında binâ olunan kalʻaya nezâret ve leyl ü nehâr bezl-i cehd ü tâkat, mahz-ı ‘ibâdet ve sebeb-i teveccüh-i Veliyy-i devlet olduğu müberhen iken, mümâ ileyhin nükûl u iʻrâzı ve semt-i muhalefete irtikâzı, ihtilâl-i dimâğ iktizâsı ve kusûr-ı nazar belâsı olup, hod-be-hod kesb-i istihkāk-ı cezâ eylediğine binâ’en, "Yedâke evketâ ve fûke nefeh" meseli hakkında darb olunsa sezâdır.