Humbaracı ve Lağımcı ocağlarının müceddeden tertib olunan şürûtları müstekarr ve muhafaza-i nizamları müstemirr olmak matlûb-ı hazret-i Cihândârî olmakdan nâşî, mukaddemâ birer sebeble ocağlarına baş olup, li-garazin ihtilâl-i kuyûd ve taklîl-i mevcûd eden bî-insâflar ʻazl ve o makûleler fîmâ-baʻd ağa olmamak şart-ı cedîde vasl olunup, erbâb-ı teʻayyün ü imtiyazdan birer mu‘temed kimselere ağalık tefvîz ü ihâle ve mikdâr-ı kifâye meʻâş taʻyîni ile zarûretleri izâle olunmasına dahi irâde-i menâyih-ifâde teʻallük etmişidi. Binâ’en-‘alâ-zâlik Dergâh-ı ‘âlî kapucu-başılarından Hasan Paşa Kethudâsı Ahmed Ağa mukaddemâ Silahdâr Ocağı'na ağa olmuş ve âzmâyiş-i evzâ‘-ı neferât etmiş bir şahıs olmağla, hakkında ‘inâyet-i Veliyy-i devlet erzânî buyurulup, Humbaracı-başılık muhavvel-i ‘uhde-i ihtisâsı kılındığı esnâda Lağımcı-başılık dahi 'Arif Bey birâderi zuʻamâdan Mehmed Emîn Ağa'ya tevcîh ve kifâyet derecesinde meʻâş taʻyîni ile terfîh olunmuşlaridi. Humbaracı-başı'nın vehm ü rehâveti ve Lağımcı-başı'nın irtikâba dâyir baʻzı hareketi sebebiyle şürût u nizâm-ı neferâta halel ‘ârız olacağı ihsâs olunduğundan başka, âsâr-ı rehâvet ü irtikâb taşralı olan erbâb-ı zeʻâmet ü timârın üç senede bir ‘alâ-tarîkı'l-münâvebe iyâb u zehâblarına rızâ verilmesini îcâb etmekle, te'dîbleri lâzım ve haleflerini terhîb mühim olduğundan, işbu Zîlka‘de'nin on beşinci günü ikisi birden ‘azl olunup, Ahmed Ağa, Gelibolu'ya ve Emîn Ağa, Burusa'ya nefy ü iclâ ve Mîr-i mîran'dan olup, bundan akdem Dergâh-ı âlî Kapucu-başılığı'nı ihtiyâr eden Ohrili İsmaʻîl Bey'e, Humbaracı-başılık ve Dergâh-ı ‘âlî kapucu-başılarından Ağa Hasan Paşa Kethudâsı Mustafa Ağa'ya, Lağımcı-başılık [217b] tevcîh olunup, şürût-ı mukarrere üzere hareketleri ve vesâyâsı gûş-i hûşlarına ilkā olundu.