İşbu Şevvalü'l-mükerrem'in beşinci günü kānūn-ı Devlet-i ebed-müddet üzere tevcîhât vukūʻ bulup, Kapu ricâli bi-ecma‘ihim ibkā olunup, Beglikçi bulunan Sun'î Efendi 'illet-i summa mübtelâ ve hıdmet-i lâzımesini edâda kusûr-ı zarûrîsi hüveydâ olup, Sipâh Kitâbeti ile tatyîb ve Rikâb Beglikçisi Sâhib Efendi hidmet-i mezkûre ile [214a] tatrîb olundu. Şıkk-ı Evvel ve Sânî ibkā şerefiyle pâ-nihâde-i silm-i kâmrânî olup, Şıkk-ı Sâlis'in el-hâletü hâzihî bir hıdmet-i mahsûsası olmayup, rütbesi ‘âlî böyle bir mansıb-ı celîlin metrûk-ı vâdî-yi ferâğ u ibtizâl olması revâ-dâşt-ı tabʻ-1 Veliyy-i devlet olmadığına binâʼen, Şıkk-ı Sânîlik gibi ahad-ı ‘azâyim-i umûra izâfe ile ashâb-ı teʻayyün u teşahhustan birine tefvîz olunması güzâriş-pezîr-i semt-i tasavvur olmuşidi. Çünki teshîlen li-erzâkı'l-‘ibâd hubûbât içün hazîne-i müstakılle tahsîs ü iʻdâd olunup, beher sâl nâzır maʻrifetiyle vâfir mâl defʻ ü cemʻ lâzım gelmişidi. Şıkk-ı Sâlis 'unvânıyla bu mâddeye mişvârı maʻlûm zevâtdan biri me'mûr olduğu hâlde nüfûz-ı kelâmına kuvvet geleceğinden başka mansıb-ı mezkûrun dahi vâreste-i ‘ârıza-i metrûkiyyet olacağı zâhir olup, fî-mâ-baʻd Nezâret-i Hubûbât mansıb-ı mezkûra rabt ahadühümâ âhara şart kılınup, mukaddemâ Nezâret içün taʻyîn olunan sekiz yüz gurûş meʻâş üzerine bu defʻa yedi yüz gurûş dahi zamm ve yevm-i mezkûrda Râtib Bekir Efendi'ye tevcîh ü 'inâyet ve selefi kudemâ-yı tarîkden olup, fakr-ı vifāk ile şöhret bulmağla, mecrûc-ı şeşper-i ye's ü nevmîdî olması muhâlif tavr-ı mürüvvet olduğuna binâʼen, meʻâş-ı sâbıkını ilâ-mâ-şâ’allah ahz u tasarruf etmek beşâretiyle dil-şâd ve bu takrîb ile kayd-ı hadem ü haşemden serâzâd oldu. Nişâncılık mansıbı es-Seyyid Feyzullâh Efendi'ye Defter Emâneti Mehmed Hakkı Beyefendi'ye Rûznâmçe-i Evvel, es-Seyyid ‘Abdullâh Birrî Efendi'ye, Baş-muhasebe, Şerîf Mehmed Efendi'ye, Şehremâneti, Câvîd Ahmed Bey'e tevcîh olunup, Tersâne Emâneti ibkā ve Darb-hâne Emâneti ile İffet Mustafa Beyefendi'nin kadri i‘lâ olunup, Matbah Emâneti, Feyzi Bey-zâde Mehmed Bey'e, Arpa Emâneti, ‘İzzet Paşa-zâde'ye, Anadolu Muhasebesi, Enverî Efendi'ye, [214b] Mukābele-i Süvârî, Ahmed Efendi'ye, Haremeyn, Yazıcı-yı sâbık Mehmed Efendi'ye, Kitâbet-i Yeniçerîyân, Tecellî Efendi'ye tevcîh olunup, menâsıb-ı bâkiye-i devlet ile sâyir ashâb-ı istî‘dâd u liyâkat mükerrem ve baʻzıları dahi inʻâmât-ı Şâhâne ile hurrem oldular. Vüzerâ-yı ‘izâm hazerâtının ekserîsi ibkā olunup, fekat Mısır Vâlîsi Vezîr ‘İzzet Mehmed Paşa'ya Anadolu Eyâleti ve Vidin Muhafızı Vezîr Sâlih Paşa'ya mısr-ı Kāhire Eyâleti ve sabıkā Belgrad Muhafızı olup, birkaç gün mukaddem vezâreti ibkā olunan Vezîr Mehmed Paşa'ya Vidin Muhafızlığı ve Anadolu'dan 'azl olunan ‘Azm-zâde Vezîr 'Abdullâh Paşa'ya Haleb Eyâleti tevcîh olundu.