Müşârun ileyhin Kütahya'dan hareketi hilâlinde vücûduna emrâz-ı mehleke müstevlî olup, şehr-i Ramazân'ın beşinci günü enfâs-ı hayâtı karîn-i ikmal ü isbâğ ve 'alem-i fânîden dâmen-efşân-ı ifrâğ oldu. Münhal olan Karaman Eyâleti, dağlı eşkıyâsına meʼmûr Çirmen Sancağı Mutasarrıfı Vezîr ‘Alî Paşa'ya ber-vech-i ilhâk tevcîh ve mütesellim ile zabt-ı eyâlet eylemesi şeref-yâfte-i sudûr olan emr-i ‘âlî ile tarafına tenbîh olundu. Müşârun ileyh Hayreddîn Paşa neslinden olup, maskat-ı re’si olan İznik'de mütemekkin iken, Sadr-ı esbak Halîl Paşa dirâyetini tashîh ve umûr-ı devletde istihdamını irâde ile Âsitâne'ye [212a] getürdüp, Baş-bâkī Kulluğu ile tefrîh etmişidi. Sadr-ı müşârun ileyhin kâffe-i tedbîri ‘azlinden sonra takbîh ve ber-keşîdeleri ashâb-ı agrâz-ı siʻâyet ile ızrâr u tebrîh olunup, müşârun ileyh dahi o hilâlde Baş-bakī Kulluğu'ndan ‘azl ve kazıyye-i darbü'l-‘asâ ile mükedder ve vilâyetine varup, bir müddet ikāmetden sonra mükâfât-ı İlâhîyye'ye mazhar olup, tekrâr Âsitâne'ye vârid ve Mîrâhûr-ı Sânî ve Kethudâ-yı Bevvâbîn-i Dergâh-ı âlî hıdemât-ı menîʻasıyla nâyil-i etemm-i mekāsıd olup, Yûsuf Paşa Sadâret'den maʻzûl olduğu hînde vezâretle Kāyim-makām nasb u taʻyîn ve etvâr-ı ber-güzîdesi sezâvâr-ı tahsîn olmuşidi. Sadrıaʻzam-ı vâlâ-makām Âsitâne-i saʻâdet'e pâ-nihâde-i ihtişâm oldukda, müşârun ileyh Anadolu Eyâleti'yle mazhar-ı ikrâm olup, ‘Acem-oğlu ve Hasan Çavuş-oğlu mâddeleriyle bir müddet iştigāl ve bi'l-iktizâ Anadolu'dan ‘azl olunup, mansıbı olan Konya'ya duhûl ‘akabinde dâr-ı âhirete intikāl eyledi. Müşârun ileyh ‘âkil ü müdebbir ve ‘avâkıb-ı umûru mütefekkir, ‘arîku'l-asl ve tayyibü'l-nesl bir vezîr olup, ancak dâyiresi halkına mağlûb ve hıkd u garaz-ı şâ'ibeleriyle medhûl ü magyûb idi. Nazm: Hümâ semerâni min-şecerin ve lâkin, ‘Aliyyün müdrikün ve ehûhü niyyü.