Levâzım-ı cihâd ve muhâfaza-i ekāsî-yi bilâd içün reʻâyâ-yı devlete mazârr u meşâk ve teklîf-i mâ-lâ-yutâk olmayacak derecelerde irâd tedârükü min-ehemmi'l-umûr olmakdan nâşî, şimdiye dek telâhuk-ı efkâr-ı ûli'l-ebsâr ile teksîr-i îrâd-ı devlete şedd-i nitak-ı ihtimâm olunmuşidi. Bu defʻa dahi resm-i yapağı mukātaʻası ihdâs ve Îrâd-ı Cedîd'e ilhâk olunup şöyle ki, memâlik-i mahrûsede mevcûd her bir re's maz u ganemden senede birer pâre resm alınup, işbu sekiz senesi Martı ibtidâsından iʻtibâr ile ber-vech-i emânet Îrâd-ı Cedîd Defterdârı tarafından 'ummâle tefvîz ü ilzâm ve kaleminde mukayyed olduğu şürût üzere harekete kıyâm ve ziyâde şey talebinden mübâʻadet etmeleri ferden-ferdâ tenbîh ü ifhâm olundu. Rüsûmât-ı mezkûre şey'-i ehass olarak aʻdâda mevzûʻ olduğundan, "Ez-her rîş yek-mû" mazmûnu zâhir ü ‘ayân ve bu sebeple ashâb-ı ‘alâka ve reʻâyâya kıl kadar girân gelmeyüp, resm-i mezkûrun edâsında müsâraʻatları nümâyân olduğundan fazla, mâl-i mukātaʻa fî-bâdiyyi'l-re'y küllî efrâdı kabîlinden olup ihâta-i efrâd ile kabûl-i ictimâʻ eyledikde, [mısrâ]: Ve evvelü'l-gaysi katrün sümme yensekibü mefhûmu üzere vâfir nükūda bâliğ olup, mesârifât-ı seferiyyeye medâr-ı küllî olacağı "Ke'ş-şemsi fi'l-hevâcir" rûşen ü zâhirdir.