Devlet-i ʻaliyye reʻâyâsından olup, ticâret-i bahriyye ile ülfet ü teʻayyüş eden tâyifenin bilâ-kayd u şart umûr-ı ticârete tesaddîleri mehâzîr-i mülkiyyeyi müstelzim olmakdan nâşî, o makūle erbâb-ı ticâretin senedât ve küfelâ ile taht-ı râbıtaya idhâl olunması lâzıme-i hâlden olup, binâ'en-ʻalâ-zâlik husûs-ı mezkûr hâlâ Deryâ Kapudânı Vezîr Hüseyin Paşa'ya ihâle olunup, erbâb-ı vukûf u tecribe ile müzâkere ve fî-mâ-baʻd reʻâyâdan olan tüccârın bilâd-ı İslâmiyye'den ihrâcı gayr-i memnû olan eşyâ ile Rûsiyye iskelelerine gidüp, beyʻ ve o tarafdan hınta vü şaʻîr ve sâyir eşyâ iştirâ Âsitâne-i ʻaliyye Akdeniz ve kendülere el verecek mahallere nakl etmek ve sefînelerine aldıklarına tâyifenin mekādir ü kemiyyât ve eşhâsını mübeyyen mukīm oldukları adaların koca-başıları yedinde mahfûz kebîr ada, mührüyle kefâlet kâğıdı ahz ve Âsitâne'ye geldikde tekrar kefîlleri alınup, yedlerinde olan memhûr kâğıdları Dîvân-hâne'de hıfz ve gümrüğe ʻilm ü haberi verildikden sonra Akdeniz'den Karadeniz'e ve Karadeniz'den Akdeniz'e li-ecli't-ticâre âmed-şüd içün ruhsat ve bir defʻa yedlerine emr-i şerîf verilüp, her defʻa Dîvân-hâne'den gümrüğe ʻilm ü haber verilmek Liman Nâzırı maʻrifetiyle iyâb u zehâbda yoklanup, tâyifeden noksân müşâhede olundukda, i‘timâd gelecek derecelerde dikkat ve tashîh-i madde olunup, noksân helâke mebnî ise iğmâz, değil ise o misillü sefîne re'îsinin adada kefîli olan Koca-başı ve Âsitâne'de olan dîger kefîli vücûd-ı mefkūda dek [207b] maʻan habs ü ibgāz olunup, zuhûr etmediği hâlde sermâye ve sefîne mîrîye zabt ve kefîller sâyire ʻibret olunmak şerâyiti ile Vezîr-i müşârun ʻileyh hazretleri mâddeyi tanzîm ve bu mefhûmda Bâb-ı âlî'ye takrîr takdîm etmekle, baʻzı izâfât-ı lâzıme ile zikr olunan nizâm kaleme kayd olunup ilâ-mâ-şâʼallâh düstûru'l-ʻamel olmak bâbında hatt-ı hümâyûn şeref-rîz-i sudûr ve bu râbıta-i hasene ile ezhân-ı ʻukalâya tebâdür eden envâʻ-ı mahzûr ber-taraf u mehcûr oldu.