Esfâr-ı sabıkadan mukaddem Moskov tüccârının Devlet-i ‘aliyye reʻâyâsından istîcâr eyledikleri sefâyinin her birinden hılâf-ı şurût-ı masdariyye vü gümrük ve harc-ı ‘ilâm ve sâyir birer nâm ile doksan dört gurûş ahz olunup seferlerden sonra zikr olunan mâdde tefrît kabûl ve bu hisâb üzere bir sefînenin [206b] harcı üç yüz elli gurûşa mevsûl olup, reʻâyâ-yı Devlet-i 'aliyye mutazarrır u rencîde ve sevdâ-yı ticâretten izhar-ı ‘acz u remîde, giderek mâdde-i ticâret bi'l-külliye dest-i bî-gâneye resîde olacağından başka, mesârif-i sefâyin ecnâs-ı eşyâya mahmûl ve bi'z-zarûre ecnâs-ı erzâkda galâ zuhûru meczûm-ı erbâb-ı ‘ukūl olup, fî-mâ-baʻd Re'isülküttâb efendilere verilegelan elli gurûş harc-ı fermân bi'l-külliye refʻ ve küttâba verilan meblağ tansîf olunup, fakat bir defʻa otuz gurûş ile ticâret emri tahsîl olunmak ve bâlâda zikrolunan harc-ı sefînenin baʻzısı ilgā ve baʻzısı hadd-i i‘tidâle tenzîl ile ibkā ve bu imtiyâzât-ı kapan vesâyir ehl-i İslâm tüccârı hakkında dahi cârî olmak üzere kalemlere 'ilm ü haber itâ olundu. Mısır ve Dimyât ve İskenderiyye ve sâyir limanlardan Asitâne-i saʻâdet'e celb olunan ecnâs-ı zehâyir ve eşyâ-yı mütenevviʻanın nakli müste'men tayifesine münhasır ve fevâyid-i ticâret-i ecânibe mahsûs olup, Cüz'-i Evvel'de tafsîl olunduğu üzere cem'-i fâyideteyn irâdesiyle tanzîm-i umûr-u ticâret ve teksîr-i sefâyin devlet matlûb-ı hazret-i Cihandârî olmuşidi. Bi-fazlihî Teʻâlâ el-yevm sefâyin-i tüccâr-ı devlet kabul-i kesret ü teʻaddüd ve hâhiş ü şevk-i ashâb-ı servet nev-be-nev kesb-i teceddüd edüp ancak sevâhil-i İslâmiye'de vâkiʻ limanlardan nakl-i zehâyir tertîbi münʻadim ve Devlet-i ‘aliyye tüccârına bir nevʻ imtiyaz verilmek lâzım olmağla, binâ-berîn Devlet-i 'aliyye limânlarından ehl-i İslâm kalyonları ve üç direkli taʻbîr olunur merâkib-i İslâmiyye ve baʻdehû reʻâyâ-yı Devlet-i 'aliyye sefâyini 'ale't-tertîb hamûlelerini alup, tertîb-i mezkûr üzere limânlardan infisâlleri vukūʻ bulmadıkça müste'men tâyifesi hamûlelerini almağa mübâşeret etmamek şurûtu tanzîm [207a] olunup, nevbet ü tertîbe riʻâyet ve hılâfından tevakkī vü mücânebet olunmak bâbında Mısır Vâlîsi'ne ve ümerâya ve sâyir sevâhil-i İslâmiyye'de vâki‘ zâbitâna hitâben evâmir-i ʻaliyye ısdâr u tisyâr olundu.