Rumeli Vâlisi Vezîr Ebûbekir Paşa'nın İlbasan ve Ohri taraflarına ʻavdeti bâlâda mufassalân tahrîr olunmuş idi. Mütefferrik olan ʻaskeri müşârûn ileyh başına cemʻ ve telâfi-yi mâfât sûretinde makarr-ı hükümeti olan Manastır Kasabası'na gelüp, etrâfa havâle-i semʻ eylediğini ifade etmişidi. Kazıyye-i mezbûrenin vukūʻu mukadderât-ı İlâhîyye'den olup, bundan sonra ne makūle tedârük lâzım geldiği müşârûn ileyhden istihbâr olundukda, sene-i âtiyede Rumeli ve Anadolu taraflarından külliyetlü 'asker sevk ü tesyîr ve mühimmât u edevât tevfîr olunup, ihtişâd-ı ecnâd ve tekmîl-i 'udde vü ʻatâd ʻakabinde bâgī-yi mezbûr üzerine hareket olunup, kuvve-i kāhire ile ifnâ vü tedmîr ve yâhûd şimdilik etrâf u eknâfı ihâtâ vü istîʻâb ve her bâr üzerine hareket olunmak üzere olduğunu işrâb eder baʻzı evzaʻ ihtirâʻ olunmak ve her çend zahm-hûrde-i devlet olup, şimdilik harekete mecâli yoğise dahi izhâr-ı celâdet mevkiinde İskenderiye'den çıkup, bir tarafa tasallut daʻvâsında olur ise mukābele vü mukavemete müstaʻidd bulunmak tedâbîri müşârûn ileyh tarafından işrâb olunmuş idi. Bâʻzı ʻavârızât-ı mülkiyye hasebiyle tedbîr-i ahîr muvâfık-ı re’y-i müşîr ü müsteşîr olmakla şimdilik tercîh olunan tedbîre müteferri olan levâzım tesviye vü tanzîm bi-fazlihî Teʻâlâ sene-i âtiyede şakī-yi merkūmun istîsâline külliyetlü ʻasker ü mühimmât tertîb olunmak tasmîm olundu.