Dağlı eşkıyâsının bir müddetden berü fukāra vü zuʻafâya eyledikleri zulm ü teʻaddînin nihâyeti olmayup, istîsâlleriyçün me'mûr olan vülâtın dâyirelerinde nizâm ve niyâm-ı iktidârlarında hüsâm olmadığından gayri, eşkıyânın müteveccih oldukları cevânibde mevcûd olan baʻzı ashâb ‘alâyık u emlâk havf-1 istihlâk-1 emvâl ile müdârâya mecbûr ve tesviye-i [198b] metâliblerinde muztarr u maʻzûr oldukları ve kulûb-ı nâs bi't-tabʻ mâyil-i fesâd u şekā ve müncezib-i semt-i erbâb-ı ehvâ olmakdan nâşî, bagy u tuğyâna cûyende-i nihân olan eşhâs u enzâl refte refte hergele-i cemʻiyyetlerine iltihâk u ittisâl ile ‘aded ü mededleri mütekessir ve müdâfaʻa vü mukāvemetleri müteʻassir olmuşidi. Tefrîk-i şeml-i cemʻiyyet ve ‘ale't-te‘âkub ferden-ferdâ tu'me-i şemşîr-i siyâset kılınmaları tedbîrine teşebbüs ve Edirne Bostancı-başısı'na tahrîrât-ı hafiyye gönderilüp: "Zikr olunan eşkıyâ cinâyet-i sâbıkalarından istifâ ve hânelerinde ikāmet istidʻâsında olurlar ise taraf ki, ruhsat verilmişdir, i‘timâd verip, 'ukde-i ittifâkların hall ve her birine taʻyîn-i makām u mahall eylesin" deyü sipâriş olunmuşidi. Bostancı-başı rü'esâ-yı eşkıyâ ile bir kaç defa muhâbere edüp, yağma vü gāretden her biri sâhib-i sermâye olduklarından çekilüp, birer tarafda mâl-i müskteseb ile teʻayyüş etmek hevâlarına muvâfık düşmenle izhâr-ı memnûniyyet eyleyerek icâbet ve mahzar-gûne-i niyâz-nâme ile dakk-ı bâb-ı şefâʻat etdiklerinde, niyâzları şimdilik 'afv u safh-ı Şehinşâhî'ye makrûn ve bu sebeble fukarâ vü zuʻafâ fursat-yâb-ı rahât u sükûn oldu mülâhazasında iken, cemʻiyyetleri müteferrik olmayup, Hasköy ve Filibe etrâfında istikrâr ve kurâ vü kasabâtı tahrîb ve kemâ-kân reʻâyâ vü berâyâyı ızrâr u taʻzîb eyledikleri ahbârı teceddüd ü teʻâkub edüp, bu vaz‘-ı garîbden gayret-keşân-ı devlet, dem-beste-i hayret ve me'mûrlara nefrîn-hân-ı melâmet oldular.