Dârü'l-harb'de ʻaskere baş ve mühim-sâz-ı cenk ü savâş olanların meştâ-nişîn olmaları muktezâ-yı fenn-i harb üzere câyiz olmayup, şu sebebden ki, Serʻasker taşrada bulunduğu takdîrde muhâsara ile iştiğāl eden ʻaskere kuvvet-i kalb olup, imdâd u iʻâne ile ʻacz u fütûrların izâle edüp, Serʻasker kışlada bir hâl olsa ictimâʻ eden ʻasker iltiyâm kabûl etmeyüp, emekler hebâ ve pay-dâr olmayan ʻasker fi'l-asl müretteb olmadığından hey'et-i ûlâ iktisabı ʻalâ-külli hâl bir seneye muhtâc ve miyânede hâsıl olan terâhî-yi zemân ile hasm-ı zebûn kuvvet-yâb-ı istidrâc olup, ʻakl u fikre gelmeyecek suver-i şenâʻat ibdâ etmek mücerreb-i uli'n-nühâdır. Bu esbâb ile Bekir Paşa'nın İskenderiyye'de kışlaması mahz-ı hatâ ve istishâb eylediği levâzım-ı istihkâmâtı hasma ihdâ siyâkında bir vazʻ-1 nâ-ber-câ idi. Bundan başka İskenderiyye kurbünde vâkiʻ ve tarîk-i vâhidi mütekātıʻ olan Leş Kalʻası'na gāyet muʻtemed ʻasker vazʻı lâzım iken, bâgī-yi merkūmun hasm-ı cânı ve belki düşmen-i hânümânı olan Topdanoğlu, zikr olunan kalʻanın muhâfazasını iltizâm etmişiken, İskenderiyyelü'nün ızmâr eyledikleri şikāka muvâfık maglatalarını ısgā ve mü’ellefetü'l-kulûbdan [196a] baʻzı erâzil ü evgādı kalʻaya teşhîn ü imlâ bir emr-i münker ve kusûr-ı ʻakl u nazardan nâşî bir vazʻ-ı nâdir beraber olduğundan fazla, muhâfızların ehâlî-yi belde ile ihtilâtları mahzûr vukūʻundan hâlî değil iken, kışlağa girildikde İskenderiyye halkı gibi fitne-engîzin tertîb-i nifâk-âmîzleri üzere konakları fevâsıl-ı baʻîde ile taʻyîn etdirmek ve ahadü-hümâ âhara muʻâvenet etmeyecek sûret ile kabûl-ı menâzil etmek şart-ı ihtiyâta mugāyir değil midir? Ve hasr u tazyîkin şartı bilâ-sebeb kavî hasım tarafına iyâb u zehâb üzere olanları menʻ iken, kalʻanın küçük kapusundan duhûl u hurûc üzere olan fitne-sâz-ı memleketi menʻ edemeyüp, giderek miyâne-i ferîkaynda tecdîd-i ʻahd ü peymân müte'ekkid ü müte'assıl ve muhâlefet-i sûriyye muvâfakat-ı maʻneviyyeye mütebeddil olup, İskenderiyyelü teşmîr-i zeyl-i iʻânet ve maʻîyyetde olan eclâf-ı ʻaskerin ekserîsi firâr u terk-i muhâsamet ve belki baʻzısı bâgī-yi merkūma mütâbaʻat eylediler.