Trâblus'da vâki“ mîrî mukātaʻalarına zulmen zamm u tahsîs ve vülât miyânında hâsılât-ı mansıb-ı iʻtibâr olunan mebâliğ ber-vech-i pîşîn Trâblus vâlîleri tarafından kabz u tahlîs olunup, sene âhirine dek refte refte vukūʻ bulan müsâderât ile ehâlî pâ-beste-i kayd-ı iştigāl ve bu sebeble emvâl-i mîrî "Bekāyâ" nâmıyla giriftâr-ı ‘ukde-i tesvîf ü izmihâl olup, hâlâ Trâblus Beglerbegisi olan Dervîş Paşa dahi bu esre iktizâ ve belki "Rahimallâhü'n-nebbâşe'l-evvel" meʼâliyle şöhret-nümâ olduğundan fazla [193a] ʻan-asl sitem-kâr ve dest-i tetâvul u mezâliminden reʻâyâ mübtelâ-yı âh u zâr olmağla, ʻazli izmâr ve şuyûʻ-ı ʻazl ile Şedîd ʻOsmân Paşa gibi mahalle karâr etmamek tedbîrine mebnî mukaddemce bir mübâşir ta'yîni tahsîn ve sâbıkā Diyârbekir Voyvodası Şeyh-zâde Kapucu-başı İbrâhîm Ağa nihânî taʻyîn olunmuşidi. İşbu Cumâdelâhıre'nin dokuzuncu Sebt günü Paşa-yı mûmâ ileyh ʻazl olunup, Kandiye Muhafızı Vezîr Hüseyin Paşa emvâl-i mîrî tahsîlinde mücerrebü'l-etvâr ve Cerde-başbuğuluğu'nu idârede sâhib-i iktidâr olduğuna binâ'en, Eyâlet-i Trâblus müşârun ileyhe tevcîh ü ihsân ve Kandiye muhafızasıyla Sadr-ı esbak Hasan Paşa cezlân ve Hânya muhafazası Mîr-i mîrân Halebli Hasan Paşa'ya tevcîh olunup, taraflarına hitâben başka başka ısdâr-ı fermân olundu.