Âl-i feyzden olup, mukaddemâ Mekke-i mükerreme pâyesini ihrâz ile dîk-i iftihârı dem-sâz-ı neşât u ihtizâz olan es-Seyyid Mehmed Efendi hakkında hûrşîd-i mekârim-i Şâhâne-i lem‘a-nisâr ve işbu Cumâdelûlâ'nın yedinci günü İstanbul pâyesiyle sâhib-i kadr ü iʻtibâr olup, ‘Osmân Paşa-zâde ‘İzzet Beyefendi dahi bende ve bende-zâde-i hazret-i Şehriyârî olup, nev-be-nev hakkında temevvüc-i deryâ-yı bî-kârân, lutf u ihsân-ı mütemmim-i sevâlif-i birr ü imtinân olduğuna binâ‘en işbu Rebîʻulâhır evâsıtında Edirne pâyesiyle mübâhî ve Tatar Bâzârcığı gibi kesîrü'n-nemâ arpalık ile dilsîr-i niʻam-ı nâ-mütenâhî oldu.