Hammâmî-zâde Vezîr Ahmed Paşa mansıbı olan Tırhala'da dâd u dihiş ile meşgūl iken nez‘-i libâs-ı hayât eylediği haberi işbu Cumâdelulâ evâyilinde resîde-i sâmiʻa-i Velî-yi devlet ve mahlûl olan Tırhala Sancağı Belgrad Muhafızı olan Vezîr Mustafa Paşa'ya ber-vech-i ilhâk tevcîh ü ‘inâyet ve bu mülâbese ile müşârun ileyh reh-yâb-ı kayd-ı müzâyaka vü zarûret oldu. Müteveffâ-yı müşârun ileyh Tersâne ricâlinden olup, Cezayirli Hasan Paşa, Donanma-yi hümâyun ile Mısır'a müteveccih oldukda, Riyâle Kapudanlığı'yla maʻân 'âzim olup, vukū bulan muhârebelerde yarârlığı zâhir ü nümâyân ve mekâsib ü ganâyimden yedine vâfir şey girdiği Hasan Paşa'nın maʻlûmu oldukda müsâdere ile müşârun ileyhi gûyâ-yı "Ene'n-nezîrü'l-‘uryân" ve târif ü tâlidini gasb ile ser-küşte-i vâdî-yi hüsrân etmişidi. Baʻdehû yine Tersâne'de müstahdem ve sevâhil-i Tuna'da olan İnce Donanma'ya başbûğ olmak üzere me'mûriyyeti ve imkân-ı vusûl münʻadim olduğundan, Şumnu'ya vürûdu ve ba‘dehû nâyil-i Vezâret olup Tuna Kapudânı olması bâlâda ber-vech-i tafsîl nigâşte-i kalem-i bedâyi‘-rakam olmuşidi. Seferden sonra Silistre'ye Vâlî ve ba‘dehû Çirmen Sancağı'yla dağlı eşkıyâsına havâle olunup, o hılâlde Belgrad matrûdlarının kal‘aya duhûlleri ma‘rûz-ı Dergâh-ı ‘âlî olduğundan Belgrad'a me’mûr ve def‘-i şûr-ı memleket ile [188a] manzûr ve tama‘ u hırs belâsıyla ma‘zûl ve ber-vech-i ilhâk üzerinde olan Tırhala'ya mersûl olmuşidi. Birkaç mâh mürûrunda sonra vefât ve terk-i dağdağa-i hayât eyledi. Müşârun ileyh şecâ‘at-i müfrita ile şöhret-şi‘âr ve idâre-i umûrda meleke vü kābiliyyeti bedîdâr ve bâ-husûs Belgrad vak‘asında sübût-yâfte-i te‘ayyün ü şühûd olan hıdmeti fî-zemânına hâzâ havârık-ı ‘âdetden ma‘dûd olup, ancak tabî‘atı zulm ü cevre mâyil ve tesvîlât-ı nefsâniyye ile mürtekib-i tavr-ı erâzil idi, tecâvezallâhü ‘an-seyyi’âtihî