Ta‘mîr ü ferş ve tezyîn ü nakşına irâde-i hazret-i Cihândârî te‘alluk eden Dîvân-ı hümâyûn mahalli Küçük Kal‘a Tezkirecisi Bekir Efendi'ye sipâriş olunmuşidi. Mûmâ ileyh tıbk-ı me’mûriyyeti üzere binâya mübâşeret ve kable'l-itmâm ‘azm-i dâr-ı âhıret edüp, hâcegân-ı Dîvân-ı hümâyûn'dan Tâhir Efendi tekmîl-i kusûra me’mûr olup, ikdâm u himmet-i Velî-yi devlet ile mahall-i mezbûr tezyîn ve sanâyi‘-i hûrde-kârîyle tâkāt u zevâyâsı sezâvâr-ı nazra-i tahsîn kılındığından fazla, destyârî-yi mühendisân-ı vakt ile sümâkī sütûna müşâkil ma‘cûndan vâfîr elvâh îcâd olunup, mahall-be-mahall erkân u a‘mideye mezc ü ilsâk ve şiddet-i imtizâc u ihtilât sebebi ile fark u temyîzi i‘mâl-i fikr-i sahîhe muhtâc olduğunda itbâk olunup fi'l-asl Dîvân mahalli târîk ü muzlim ve fark-ı eşhâs içün dikkat lâzım iken, ba‘zı tasarrufât-ı sınâ‘iyye ile mahall-i mezkûr münevver ü rûşen ve sefîd ü siyâh ve dirâz u kûtâh mu‘ayyen olduğundan gayri, sakf u cidârı min küll'l-cevânib zer ü zîver ile âreste ve der ü dervâzesi eşkâl ü ersâm Mânî-pesend ile pîrâste kılınup, hâric-i kubbe-i hümâyûnda vâki‘ Dîvân-hâne'de ahşâbdan masnû‘ olan ba‘zı zevâyid dahi hazf u def‘ ve medâ-yı nazara hâyil olan ‘avâyık bi'l-külliyye ref‘ olunup, hattâ Re’îsülküttâb efendilere mahsûs olup, Kubbe i hümâyûn kapusu ittisâlinde olan oda dahi intikāz ve [188b] rûznâmecilerin verâsında vâki' Hazîne'nin hâlî mahallinden bir mikdâr yer ifrâz u i‘tiyâz olunup, mefrûşâtı dahi kalay-1 zerdûz ve kumaş-ı dil-efrûzdan tertîb ve Kubbe-i hümâyûn kapuları ve kitâbeleri ser-âpâ tezhîb olunup, bu eser-i pesendîde vü makbûl dahi sâyir meʼâsir-i hazret-i Şehriyârî'ye mevsûl kılındı. Gālib Efendi'nin bu eser-i Mülûkâne'ye inşâd eylediği târîhdir: Füyûz-ı sırr-ı ilhâm ile Gālib geldi bir târîh, Selîm Hân yapdı hem tâk-ı felek bu câ-yı Dîvân'ı.