Ravza-i mutahhara lâ-zâlet bi-nefehâti'l-kusiyyeti'l-muʻattara dâhilinde baʻzı mahallerin lüzûm-ı taʻmîri ve bâ-husûs muvâcehe-i şerîfede mansûb aʻmideden elli iki kıt'a aʻmidenin mürûr-ı zemân ile kâşîleri fersûde ve baʻzı mahalleri li-ecli't-teberrük eyâdî-yi züvvâr ile berkende olduğu şinâver-i bahr-ı rahmet-i Hâlık olan Hudâvendigâr-ı sâbık hazretlerine ‘arz u ifade olunup, lâyıkı üzere tarsîn ü taʻmîrini irâde hılâlinde ‘âzim-i serâbistân-ı cenân olmuşlaridi. Cülûs-ı hümâyûn-ı şevket-makrûn vukūʻunda bu keyfiyyet vâsıl-1 sem‘-i Şehriyâr-ı me‘âlî-menkibet olmağla dâʻiye-i şevk ü garâm-ı Şâhâneleri niyyet-i sâbıkayı te’kîd ve ol bukʻa-i mübarekeyi ber-vech-i ikmal taʻmîr ü teşnîd zımnında fermân-ı hümâyûnları cereyân edüp, a'mide-i sâlifü'l-beyân mikdârı mermer ‘amûdlar mukaddemâ keşf ü tahmîn olunduğu vech üzere Âsitâne-i sa‘âdet'de i‘mâl ve çîre-destî-yi [187a] mühre-i seng-tırâşân ile saykal u cilâsı verilüp, bir iki sene zarfında ikmâl ve ol savb-ı şeref-evbe bahran irsâl olunup, hâcegân-ı Dîvân-ı hümâyûn'dan İbrâhîm Efendi ber-vech-i muharrer Binâ Emâneti'nde tahdîm ve muktezâ olan ‘amelesi terfîk ve mâlzemeleri tanzîm olunup, mesârifât-ı taʻmîr dahi nakden teslîm olunmuşidi. Meded-kârî-yi Mürsilü'r-riyah ile aʻmide-i mezkûre fürza-i Medîne-i münevvere olan Yenbûʻa ihrâc olunup, necâyib-i cemâle tahmîl ve tîbe-i Tayyibe'ye tavsîl olunup, Binâ Emîni dahi o esnâda kat‘-ı feyâfî vü merâhil ile ol sû-yi dil-cûya vâsıl olduğuna binâ'en, îfâ-yı meʼmûriyyete teșmîr-i dâmen-i ihtimâm ve sâlifü'z-zikr ‘amûdları istîʻâb eden fersûde kâşîleri tanzîf ile trâşîde-i fe's-i himmet ve menhût-ı dest-i hüsn-i sınâʻat olan aʻmideyi yerlü yerine vaz‘ u ilhâm eylediğinden gayri, Ravza-i mutahhara dâhilinde ve kabr-i şerîf havâlîsinde vâki olup, muhtâc-1 taʻmîr olan mevâzıʻı dahi kemâl-i âdâb u taʻzîm ile terkīm ve hıdmet-i pesendîde takdîm edüp, Şehriyâr-ı marzıyyü'l-Faʻâl şeyyedallâhü esâse devletihî me'tmeʼenneti'l-vihâdü ve'stekarrati'l-cibâlü hazretleri hakk budur ki, bu vaz‘-1 cemîl ve eser-i bî-misl ü ‘adîl ile dahi ism-i sâmîlerin eyvân-ı keyvâna îsâl ve Harem-serây-ı merkad-ı hazret-i Seyyidü'l-mürselîn'e hürmet ile tahsîl-i rızâ-yı Zü'l-celâl edüp, saʻy-i Hâkānîleri meşkûr ve dünyâ vü ‘ukbâları maʻmûr ve ‘amm-ı emcedleri Hudâvendigâr-ı mebrûr dahi sebkat-i niyyet ve ihlâs-1 ‘azîmet hasebiyle fazl-1 nâ-mütenâhî-yi Rabb-i Gayûr'dan hisse-mend-i sevâb-ı mevfûr olması müteyakkın-ı erbâb-ı şuʻûrdu.