Savâdır-ı ahvâl-i kâyinât ve bevâdir-i evza‘-ı mevcûdât bi-hükm-i [mısra]: Elâ küllü şey'in mâ-hala'l-lâhü bâtilü ‘arz-ı fânî vü zâyil ve beyne'r-Rabbi ve'l-abdi hicâb u berzah hâyil olup, mezraʻa-i âhiret olan dünyâda zer‘-i büzûr-ı hayr ile nâyil-i mahsûl-1 ecr-i cezîl ve kișt-zâr-ı ‘ukbâ olan dâr-ı fenâda neşr-i hubûbât-ı hasenât ile hûşe-çîn-i fiʻl-i cemîl olmak fi'l-asl mehâbîb-i İlâhîyye'ye bir ‘atıyye-i behiyye olduğu zâhir ve bu niʻmet-i nefîse her şahsa müyesser olmadığı "Ke'ş-şemsi fi'l-hevâcir" bâhirdir. Nazm li'l-müverrih: Fiʻlü'l-cemîli ‘atâ'ün leyse-yeblüğuhû, İllellezî ramekathü ‘aynü tevfîk. Ve bu makūle zâd-ı âhiret ve tūșe-i râh-1 ‘âkıbet, tedârükü kāyid-i gürûh-1 enbiyâ ve sâlâr-ı sufûf-1 esfiyâ, mefhar-ı rusul ve Hâdî-yi sübül, kutb-1 dâyiretü'l-vücûd-ı risâlet, küll-i sad-berk-i hadîkatü'l-mecd-i nübüvvet, nazm: Nebiyyün etemmellâhü sûrete fahrihî, Ve âdemü fî-fehhârihi yetesavverü, Nebiyyün lehü'l-havzânü hâzâ esâbiʻu, Tefîzu ve hâzâ fi'l-kıyâmeti kevserü. medîha-i sarîhası külliyât-ı mehâsin-sıfatına nazaran cüz’-i mevhûm, nazm: Hulikte [185b] müberra’en min-külli ‘aybin, Ke-enneke kad hulikte kemâ teşâ'ü. sitâyiş-i garrâsı kitâbe-i dîvân-hâne-i iclâlinde kalem-i kudret ile merkūm olan Muhammedü'l-Mustafâ, [nazm]: ‘Aleyhi salavâtüllâhi mâ-zerre şâriku. hazretlerine ednâ mülâbese ile kesb-i tekarrüb etmekden terettüb ve sâʻî-yi bi'l-hayrât olan zevât-ı kâmilü's-sıfât bu misillü vesâyil-i hayriyyenin zuhûruna her bâr çeşm-dâşt-ı intizâr u terakkub oldageldikleri emr-i beyyin ü vâzıhdır. Nazm: Habîbin sev dilersen mağfiret takrîbin ey Âlî, Rakîb olmak kadr-i Mevlâ'ya rengîn intisâb olmaz. Mefhûmu üzere safvet-i derûn ile dil-beste-i muhabbet-i hazret-i Nebevî olmak Mevlâ-yı müteʻâl'e mûceb-i intisâb ve semere-i muhabbet dahi zevâhir-i ahvâl-i muhibb-i sâdıkdan istidlâl olunmak müheyyic-i eşvâk-ı sâf-dilân-ı ahbâb olacağı bî-irtiyâb olmağla, fe-li-hâzâ, nazm: Tâlib-i 'afv u şefâʻat ez-Resûl-i kibriyâ, Sâye-i Hakk Şeh Selîm Hân bin Sultân Mustafâ. hazretleri ol Dergâh-ı ‘arş-iştibâha tevessül ve şefâʻat-i hâssa cenâb-ı Seyyidü'l-mürselîn'e tevassul irâdesiyle nazargâh-ı Hâlık-ı beşer ve mehbit-1 nâmûs-ı ekber, ziyâretgâh-ı kudsiyân-ı metâf-ı kerrûbiyân olan zarîh-i akdes-i münevver ve merkad-1 eşref-i mu'attarlarına müceddeden hıdmet-i sâdıka takdîm, ya'nî Ravza-i mutahhara'nın kisve-i şerîfe ve perde-i latîfesini tecdîd içün isâle-i nehreyn-i zer ü sîm edüp, nesc ü iʻmâl ve isdâl ü ikmâlini Şehremîni bulunan Mehmed Efendi'ye sipariş ü ifhâm ve fî-akrebi'l-eyyâm zikr olunan pûşîde-i vâcibü'l-ihtirâm ahsen-i vechile resîde-i hayyiz-i hitâm ve eczâ olarak sandûkalara vazʻ u taʻbiye, nazm: Bikāʻun ‘alâ mikdârihâ iz-meşâbihâ, Ve hâzzün ‘bîrü'l-miski fî-hâ müşâbihâ. medlûlüne mâ-sadak olan bukʻa-i mübarekeye îsâli Bînâ Emîni nasb olunan [186a] hâcegân-ı Dîvân-ı hümâyûn'dan İbrâhîm Efendi'ye tevsîh olunduğundan başka, altmış altı zirâ düz gûgez atlas üzerine Sûre-i Feth ve tuğrâ-yı hümâyûn ve ism-i sâmî-yi hazret-i Şehinşâhî nesciyle vasat-ı şebeke-i şerîfeyi hâvî kenârları mutallâ şerît ile muhât bir kıt'a miyân-bend ve siyâh atlas üzerine, "Hâzâ kabru Nebiyyinâ Resûlullahi sallallâhü ‘aleyhi ve sellem" nesc olunmuş bir levha-i şerîfe ve üç levha ki, birisi "Hâzâ kabru seyyidinâ Ebû Bekr radıyallâhü ‘anhü" ikincisi "Hâzâ kabru seyyidinâ ‘Ömerü'l-Fârûk radıyallâhü ‘anhü" ve üçüncüsü "Hâzâ kabru seyyidinâ Fâtımatü'z-zehrâ radıyallâhü Te‘âlâ ‘anhâ" terkîbleriyle siyâh atlas üzerine zerrîn-târ ile nesc olunmuşdur. Merâkıd-ı şerîfelerine taʻlîk olunmak içün Efendi-yi mümâ ileyhe teslîm ve minvâl-i meşrûh üzere i‘mâl ve Kelime-i tevhîd ve baʻzı âyât-ı şerîfe resm olunmuş bir kıt'a şeb-çerâğ pûşîdesi ve sâlis-i Hulefâ-yı Râşidîn ve beşâret-yâb-ı behişt-berîn olan ‘Osmân bin ‘Affân radiye ‘anhü'r-rahmân hazretlerinin yed-i mübârekeleriyle yazılmış Mushaf-ı şerîf'in mahfûz olduğu mahall-i mes‘ûda vaz‘ u âvîze olunmak içün kenârları sebz-gûn ve vasatı atlas sırma ile âyât-ı şerîfe ve esmâü'l-hüsnâ ve esâmî-yi 'aşere-i mübeşşere ve nâm-ı nâmî-yi hazret-i Pâdişâhî işlenmiş bir ‘aded perde-i bâb ve Bakī'de medfûn ecille-i ashâb ve yârân-ı hazret-i Nebî-yi ‘âlî-cenâbın merâkıd-ı münevverelerine pûşîde kılınmak içün dört yüz elli zirâ aʻlâ yeşil çuka ve ferrâșân-ı Ravza-i behişt-nișân ve huddâmân-ı ‘atebe-i melâ'ik-pâsbâna ilbâs olunmak içün seksan kadar atlasî çuka ferrâce yine mûmâ ileyh ile ol savb-ı şeref-evbe irsâl ü takdîm olunmuşidi. Efendi-yi mûmâ ileyh meʼmûr olduğu hıdmet-i müteberrekeyi irâde-i hazret-i Cihândârî üzere ru’yet ve vedîʻa-i [186b] zimmet-i kifâyeti olan icrâ-yı pûşîde-i pür-bereketi ol mâkām-ı lâzımü'l-ihtirâma îsâl ü terkîb ve sandûka-i şerîfeye göre tensîk ü tertîb ile ikmâl-i hidmet ve sâyir âvîzeleri dahi tenbîh ü sipâriş olunan mahallere taʻlîk ve ber-güzar-ı Şehriyâr-ı tevfîk-i refîk edüp, Bakī‘'de medfûn olan ashâb-ı güzîn hazerâtının mezâr-ı pür-envârlarını dahi mevdû‘-1 yed-i emâneti olan çukadan iksâ ve hıdmet-güzârân-ı Ravza-i mutahhara'yı dahi sâlifü'l-beyân hil'atler ile nâyil-i meserret-evfâ ve ez-ser-i nev müvâzıb-ı ferâyiz-i duʻâ vü senâ edüp, işbu eser-i cemîl ü bihter mahzâ hürmet-i şân-ı Cenâb-ı Seyyidü'l-beşer niyyet-i hâlisesiyle kâr-ger olduğuna binâ'en, inşâ'allâhü Teâlâ dünyâda sebeb-i husûl-i murâdât ve 'ukbâda mûceb-i terakkî-yi derecât olacağı bî-iştibâhdır. Nazm li'l-müverrih: Râh-ı şâh-ı tahtgâh lî maʻallâh eder, Yekke tâzân-ı muhabbet mühce vü ve mâlın fedâ.