Dürr-i girân-mâye-i vücûd-1 hazret-i Nebevî'ye sadef ve mühr-i ‘âlem-tâb, cism-i nûrânî-cenâb-ı Mustafa'ya Beytü'ş-şeref olan Medîne-i münevvere lâ-zâlet bi-envâri'l-İlâhiyyeti müsevverede ‘an-asl üç nefer ocak kethudâları olup, ‘azl ü nasbları cünhaları zuhûrunda Şeyhu'l-haremlere müfevvez ve kethudâlar ikisi müttefikan birinin sû'-i hâline şehâdet ile vücûb-ı ‘azlini ifade ederler ise [184b] ‘azli câyiz olup, şahs-ı vâhidin emr-i şehâdetde infirâd ile imtinâ‘-ı ‘azl miyânelerinde meşrût iken, zikr olunan kethudâların biri dîgeriyle münâfese üzere olup, Şeyhu'l-harem'e siʻâyet ve mûmâ ileyhin dahi şahs-ı mezkûra ‘an-asl infi‘âl ü gayzı olduğundan, derhâl icâbet ile ‘azline mübâderet ve âhara ilbâs-ı hil‘at eylediğini maʻzûl Kethudâ istimâʻ ve yedinde vedî‘a olan sancağı teslîmden imtinâ‘ ve beyne'l-‘Arab müteʻârif olan ‘âdete sülûk birle kal'a tarafına düşüp, neferât-ı kal‘a kazıyyeyi tahkīk ve mugāyir-i şart olduğundan, bu tevcîhin ilgāsıyla sâbıkının ibkāsı içün dest-bâz-ı niyâz olduklarında, Şeyhu'l-harem perde-i ilticâlarını temzîk ve izhâr-ı ruʻûnet ile ‘adem-i müsâʻadeyi eymân-ı mugallata ile tevsîk edüp, neferâta ye's ü nevmîdi hâsıl ve giderek muhâvereleri mevki‘-i müşâcereye vâsıl olduğu hînde, Nâ’ibü'l-harem olan Beşîr Ağa Şeyhu'l-harem'e câ-nişîn olmak kasdıyla nâyire-i fitneyi ‘adem-i teskîn ve Şeyhu'l-harem-i sâde-dili igfâl ve: "İzhâr-ı metânet lâzıme-i zimmet-i abtâl-i ricâldir" deyerek teşvîr-i harâret ile nasb-ı şebîke-i ihtiyâl eylediğinden, mâdde teverrüm ve ağayân-ı Harem ile yerlü neferâtı miyânında nâyire-i harb ü aşûb bu sebebler ile tevakkud u tazarrum ve birkaç mâh muhârebeleri kabûl-i temâdî ile muhâlif-i tavr-ı edeb harekete âgāz ve hetk-i perde-i hürmet eyleyerek cîrân-ı Harem-i Nebevî'yi pâ-beste-i dâm-ı ihtirâz ve yek-dîgere dest-i taʻarruz-ı dirâz eylediler. Birkaç defa miyâneye muslih tavassut edüp, Şerîf-i Mekke tarafından dahi izâle-i tegāyür-i cânibeyn ve ıslâh-ı zâtü'l-beyn irâde olunmuşiken, tarafeyn muʻânede vü münâkaşada teferrüd ve garazlarını icrâda izhâr-1 tecellüd edüp, [185a] Şâm Vâlîsi ve Mîrü'l-hâcc olan Vezîr Cezzâr Ahmed Paşa Medîne'ye vürûd eyledikde hakīkat-ı hâle ittlâʻ ile Şeyhu'l-hârem'i ‘azl ü tenkîl ve yerine birini tevkîl etdikden sonra, tahrîk-i fitnede eli ve 'arbede-i tarafeynde medhali olan Nâ’ibü'l-harem'i mukayyed ve maglûl-i istishâb ve Medîne'den bir iki sâʻat infisâl vukūʻunda Nâ’ibü'l-harem mûmâ ileyhin hâne-i vücûdu harâb ve kasr-1 'ömrü perde-i seylâb-ı helâk u tebâb olup, yerlü neferâtının dahi iktizâ eden te'dîb ü gûşmâlleri muktezâ-yı hâl üzere icrâ ve ba‘dehû Mekke tarafına sevk-i metâyâ olunup, ‘avdetde Şeyhu'l-harem maʻzûl, Mısır tarafına ‘azîmet ü kufûl zımnında ruhsat-hâh u mes'ûlüne müsaʻade birle canib-i Mısır'a rû-be-râh olup, Medîne-i münevvere'de tekevvün eden şûriş ü fiten bu takrîb ile zâyil ve kulûb-ı ehâlî-yi Yesrib'de sükûn u itmi'nân hâsıl oldu.