“Uşşâk Kadısı'na müstevlî olup, kesret-i zulm ü fesâdına mebnî izâlesi irâde buyurulan 'Acemoğlu üzerine Anadolu Vâlîsi Vezîr ‘Ali Paşa meʼmûr ve 'asâkir-i etrâf maʻiyyetine sevk olunup, mühimmât ve sâyir levâzım ile maslahatı meysûr kılınmışidi. Bir-iki mâh mukaddem karındaşı ‘Osmân Bey'i kapusu halkı ve etrâf-ı 'askeriyle [184a] şakī-i merkūmun üzerine taʻyîn edüp, muhârebeye tesaddî vaktinde başında olan eşhâs u erâzil sadme-i eşkıyâya mütehammil olmayup, müteferrik ü münteşir ve emvâl ü eşyâ gāretiyle vaz‘-1 nâ-bercâya mütecâsir olmuşlaridi. Vezîr-i müşârûn ileyh kazıyyeye tahsîl-i vukūf ve derhal ceng-cûyân-ı etrâfdan cem‘-i ulûf edüp, bi'n-nefs Kütahya'dan hareket ile istîsâline ‘âzim ü mukīm olduğu Banaz nâm mahalli ihâta ile tazyîk ü izʻâcına mülâzim olmuşidi. Mahall-i merkūm handek ve dâîren-mâ-dâr su ile muhât u mutavvak olduğundan, lâ-mahâle bir müddet muhâsaraya muhtâc iken, maʻiyyetinde olan ‘asker-i bî-hamiyyet şiddet-i șitâ-yı ‘illet eyleyerek geldikleri semte ‘avdet ve müşârûn ileyh cünd-i kalîl ile meydânda kalup: "Mübâdâ hasm-ı denî vâkıf-ı hâl olup, izhâr-ı tavr-ı düşmenî eder" deyü müşârun ileyh dahi hareket ve Kütahya'ya vürûd u ikāmet eylediği ihbârı maʻrûz-ı ‘atebe-i hazret-i Tâcdârî kılınup, evvel behârda tedârük-i tâmm ile müşârûn ileyh şakī-yi merkūmun üzerine varup, gereği gibi hasr u tazyîk ve libâs-ı hayatını temzîk etmek üzere hatt-ı hümâyûn- mehâbet-rîz sudûr olmağla, binâ’en-‘alâ-zâlik müşârûn ileyhin meʼmûriyyeti tecdîd ve şimdiden telâfî-yi mâ-fâta mübâşereti te’kîd olundu.