Dağlı eşkıyâsı üzerine bundan akdem taʻyîn olunan Vezîr Zihneli Hasan Paşa birkaç mâhdan berü Filibe ve Sofya etrâfında geşt ü güzâr ve merâm-ı Devlet-i ebed-kıyâm üzere def-i eşkıyâya zafer-yâb olamadığı âşikâr olup, Kethudâsı olan Dâvud Bey nâm şakī ki, birkaç defa Rumeli eyâletlüsünü ifsâd [179b] ve sulh ‘akabinde eyâletlünün İbrâ'îl cânibinde istikrarları irâde olunmuşiken, hevâ-yı memleket ile girîve-i 'isyâna merkūmları isʻâd ve teferruka ‘illet olarak mukābele-i aʻdâda nâmûs-ı devleti berbâd etmişidi. Bu defa dahi müşârûn ileyhin Kethudâsı bulunmak takrîbi ile eşkıyâ mecmaʻında olan ‘usât-ı Arnabud ile müttefik ü yek-dil ve ber-muktezâ-yı 'illet-i cinsiyyet galeyân-ı dem-i fâsid-i gayret ile miyânelerinde ahbâr u resâyil tedâvül eylediğine ‘ilm-i veliyy-i devlet şâmil olmağla, hakkında fermân-ı kazâ-cereyân sâdır ve ser-i nuhûst-eseri bürîde-i seyf-i bâtır olup, dağlı eşkıyâsı dahi hulûl- mevsim-i şitâ hasebiyle misâl-i haşerât-ı zemîn surâh-ı mekîdetlerine çekilüp, o havâlî nev-‘ammâ emîn olduğu müstebîn olduğundan mansıbı olan Silistre'ye ‘azîmeti istisvâb ve def‘-i eşkıyâ ‘unvânıyla mukâddemâ isticlâb eylediği Arnabud tâyifesini o taraflarda terk etmeyüp, ma‘an istishâb eylemesi tarafına emr-i ‘âlî ile işrâb ve o havâlî külliyen hâlî kalmak hazm u ihtiyâta gayr-i muvâfık olduğuna binâ’en, rükûb u nüzûl ile mü'telif ve mekâyid-i hurûb u gārâta vukūf ile muttasıf bir vezîrin Çirmen Sancağı'nda temekkünü lâzım gelüp ve Vidîn Muhâfızı ‘Ali Paşa ile serhadlünün şimdiye dek birkaç def‘a münakāşa ve mu‘ârazaları vukū‘ ve birbirinden emniyyetleri münselib olduğu beyne'n-nâs şüyû‘ bulup, Vezîr-i müşârûn ileyh el-hâletü hâzihî serhadlüye mağlûb ve fîmâ-ba‘d Vidin'de ikāmeti ednâ-yı fâyideyi mûcib olmayub, ‘azli resîde-i hayyiz-i vücûb olduğundan, Çirmen Sancağı tarafına tevcîh ü ihsân ve tedmîr-i eşkıyâ zımnında tarafına ısdâr-ı fermân olundu. Selanik, yâhûd Eğriboz sancaklarının birisi Mîr-i mîrân'dan Kürd Paşa dâmâdı birâderi Ca‘fer Paşa'ya tevcîh olunmak Rumeli Vâlîsi tarafından istid‘â ve bu esnâda müşârûn ileyh hatb-ı cesîme me'mûr [180a] olup, tenfîz-i mes’ûlâtı iktizâ edüp, Eğriboz Sancağı, Bender Muhâfızı olan Hasan Paşa üzerinde olmağla ref‘i revâ görülmeyüp, Selanik Sancağı ile Mîr-i mîrân-ı mûmâ ileyh tatrîb ve Vidin Muhâfızlığı ile kat‘-ı hudûda me'mûr, sâbıkā Selanik Mutasarrıfı Vezîr Sâlih Paşa tatyîb olunup, o makūle serhad ba‘zan Kāyim-makām ile zabt olunageldiğinden, Vezîr-i müşârûn ileyhin me'mûr olduğu hidmet vâsıl-ı serhadd-i gāyet olunacaya dek mukâddemâ ba‘zı husûs ile ol cânibe me'mûr olan Kapucu-başı Kolçak Mustafa Ağa, Vidin Kâyim-mâkāmı nasb olunup, ifâde-i hâli müş‘ir, taraflarına başka başka misâl-i lâzımü'l-imtisâl irsâl olundu.