Mekke Kadısı Kezûbî-zâde Emîn Efendi itmâm-ı müddet ile Medîne-i [178a] münevvere'ye ʻavdet eyledikde [mısra]: Yalan dünyâdan el çekdi, Kezûbî-zâde fevt oldu. mısraʻ-ı bercestesine mâ-sadak ve garîk-i rahmet-i Feyyâz-ı mutlak olup, kezâlik Medîne-i münevvere Kadısı Arslân-zâde ʻAbdulbakī Efendi mâh-ı Zilhicce'nin on yedinci günü tuʻme-i şîr-i ecel ve dâr-ı fânîden peyvend-i küsül-i emel olduğuna binâ'en, sâbıkā Burusa Kadısı olan ʻOsmân Efendi müddet-i nâkısayı tetmîm sûretinde Mekke-i mükerreme kazâsıyla tekrîm ve iʻtibâr-1 tevcîhi gurre-i Muharrem olmak cihetiyle bundan akdem nâyil-i pâye olan İmâm-ı Evvel-i Sultânî ve mahdûm-ı Fetvâ-penâhî'ye takdîm olundu. Ve aʻyân-ı hüccâc-ı zevi'l-ibtihâcdan sâbıkā Mîrâhûr-ı Evvel olan Hâce-i hazret-i Şehriyârî Mehmed Ağa bahran bender-i Cidde'ye şirâʻ-güşâ-yı ʻazîmet ve Cidde'ye tahsîl-i kurbiyyet eyledikde müddet-i hayâtı resîde-i derece-i nihâyet ve verkā-yı ruhu tâyir-i sû-yi âhiret oldu. Mûmâ ileyh birkaç sene nazar-ı kîmya-eser-i Mülûkâne ile manzûr ve nüfûz-ı kelâm u iʻtibâr-ı tâmm ile meşhûr olmuşiken, meʼmûr olduğu hıdmetden gayri bir husûsa itâle-i dest-i taʻarruz etmeyüp, ʻâyidât-ı muʻayyeneye kanâʻat ve ahz-ı bertîl ü rüşvetden mücânebet ile vâreste-i nifâk ehl-i siʻâyet olup, ikbâli müstemirr ü memdûd ve ʻâkıbet-i emri dahi gayr-i mahmûd oldu. Şeyhu'l-harem olan ağa bir müddet ser-nihâde vü sâde-bîmârî ve teslîm-i rûh ile ʻâzim-i savb-ı rahmet-i Bârî olup, hıdmet-i refîʻası hâlî kaldığı maʻrûz-ı Dergâh-ı ‘âlî oldukda, Şâm-ı şerîf'de el-yevm bisât-ârâ-yı ârâm olan sâbıkā Dârü's-sa‘âde Ağası İdrîs Ağa Şeyhu'l-harem nasb olunmak ile ibcâl ve bu mazmûnda tarafına irsâl-i misâl-i lâzımü'l-imtisâl kılındı.