Ebnâ'-ı sipâhiyâna Ağa olan Halebli-zâde Ahmed Ağa işbu Safer'in yigirmi birinci Cumʻa gecesi ‘illet-i insâb ile defn-i türâb ve münhall olan mansıbı ile Dergâh-ı ‘âlî kapucu-başılarından Sakızlı Mehmed Ağa kâm-yâb oldu. Nazm: Bi-zâ kazati'l-eyyâmü mâ-beyne ehlihâ, Masâyibü kavmin ‘inde kavmin fevâ'idü. Mûmâ ileyh mukaddemâ Şâm Vâlîsi Cezzâr Ahmed Paşa'ya Kapu Kethudâsı olup, miyânelerinde cereyân eden dâd u sited nizâʻı ilâ-hâze'l-ân mümtedd olup, tesviye-i tarafeyn ve ıslâh-ı zâtü'l-beyn mümkin olmadığından, erkân-ı Devlet dest-zen-i efsûs u hayret iken, mûmâ ileyhin vefâtı bâʻis-i tervîh-i nefs-i kâr-fermâyân-ı vakt olduğundan başka, müşârun ileyhin hadd-i insâfından hâric olan lecc ü inkârı fikdân-ı hasm ile fîmâ-ba'd revâc-dâde-i kârı oldu. Hakīkat-ı hâle nazaran Halebli-zâde'nin iddiʻâ eylediği bin şu kadar kîsenin reʼsü'l-mâlına nısfı mikdârı mâlın zammı hayyiz-i imkânda olmayup, ribh ü zevâyid zamm olunsa bile rubʻ mikdârı ancak izâfe mümkin olabilir. Bu takdîrde hasmın bi'l-külliye iddi‘â olunan emvâli inkâr ile ibtâl-i hakk eylemesi mürüvvet ü insafdan hâric bir tavır olduğu zâhirdir. ʻÂkıbetü'l-emr bu dâ'-i ʻasîrü'ş-şifâ mûmâ ileyhi bahr-ı hayrete ilkā ve helâkına sebeb-i akvâ oldu. Zîrâ mâl şakīk-i rûh ve merhem-ı cürûh olduğu mevkiʻ-resân-ı vuzûhdur.