Müşârûn ileyh Kars sükkânından olup, bidâyet-i hâlinde kıtâr-ı güsiste-mehâr-ı evbâş-ı levende iltihâk ve tâyife-i mezkûre refʻ olundukda divânegân zümresine iltisâk ve giderek ‘Azm-zâdelere intisâb ile Deli-başılık ‘unvânını iktisâb ve baʻde-bürhetin mine'z-zemân Âsitâne'ye gelüp,: "Cânib-i Hicâz'ın ahvâline vakıfdır" deyü istintâk u isticvâb ve levend-nâme sûretinde olan tavr u tarzı Sadr-ı esbâk Cezayirli Hasan Paşa'nın mizâcına muvâfık gelüp, bir zemân merkūmu istishâb etmişidi. Müşârûn ileyh doksan dokuz târîhinde Kāyim-makām bulunup, İmâret-i Hâcc isti‘dâdını vermek içün Cerde Başbuğluğu'nu [170b] Mîr-i mîrânlık ile merkūma tevcîh ve Sahib-i sadr-ı hazîne-dâr ‘Ali Paşa Asitâne'ye geldikde: "Cerde Başbuğluğu umûr-ı cesîmeden olup, bu makūle mechûlü'l-asl şahs-ı sâkıta tevcîhi gayr-i vecîhdir" deyü ‘azl edüp, Karahisâr Sancağı'yla Sinob muhafazasına taʻyîn etmişidi. İki yüz târîhinde Kars muhafazasına meʼmûr ve iki yüz birde tekrâr Cerde Başbuşluğu'yla mesrûr olup, iki yüz ikide nâyil-i İmâret-i Hâcc ve imtidâd-ı vakt ü zemân ile vâreste-i kayd-ı ihtiyâc ve iki yüz beşde bâ-Eyâlet-i Rakka, Bağdâd Muhafızı Vezîr Süleymân Paşa maʻiyyeti ile me'mûr-ı defʻ-i gāyile-i Tîmûr olup, müşârûn ileyh ile 'azîm münâkaşa ve etbâʻları beyninde gâh u bî-gâh ve muhâreşe vü münâveşe ‘akabinde Adana ve Mar'aş eyâletlerine Vâlî olup, Köse Mustafa Paşa munfasıl olduğu Haleb'den mansıbı olan Rakka'ya gider iken, muhtâc-ı nizâm olan ‘Ayntâb reh-i râstında olmak mülâbesesiyle tarafına nizâm fermânı gönderilmiş olmağla, bi-hasebi'l-emri'ş-şerîf ehâlî-yi beldeyi taht-1 râbıtaya idhâl ve serkeşlerini terhîb ü tahvîf etmişiken, 'Ayntâb Marʻaş'a muzâf olup,: "Dâhil-i kalem-rev-i hükûmetim ve nizâmı mütehattim-i zimmet-i himmetimdir" diyerek sâʻid-i zulm ü ‘udvânı teşmîr ve Mustafa Paşa'nın verdiği nizâmı tahkīr ve firârîleri celb ile ahz-ı mâl-i kesîr eylediğinden fazla aldığı mâlı yâr-ı kafa-dâr ‘add eylediği evbâş u erâzile infâk ve niçe bî-günâhın rûhunu izhâk eylediği mûceb-i igbirâr-ı tabʻ-ı hümâyûn olup, derhal ‘azl ile tekdîr ve Kayseriyye ve Niğde sancağları tevcîhi ile hakkında ızmâr-ı [171a] kîn tedmîr kılınmışidi. Niğde'ye hatt-ı rihâl-i zulm ü ‘udvân ve meʼlûf olduğu vech üzere ahz u fetke şitâbân olduğunu eʻâlî vü ve esâfil-i ehâlî müşâhede ile der-i devlet-medâra ref-i rukʻa-i şikâyet etmeleriyle, izâlesi bâbında olan kasd u niyyet müte'ekkid ü mütehakkık olup, müctemiʻ olan haşerât-ı nâs tefrîk olunmak irâdeleriyle Rumeli tarafında mürûr eylemesi ibtidâ-yı emrde tarafına emr ü işʻâr ve nihânî Yeni-il Voyvodası'na istîsâl fermânı tisyâr olunup, mevcûd-ı maʻiyyeti olan küştenîler kazıyyeye vukūf ile tarafetü'l-‘aynda perîşân ve kendüsi dahi müsteşʻir bulunup, ne mahalle 'azîmet eyleyeceğinde hâyim ü hayrân olup, encâm-ı kâr iç dâyiresi halkıyla serserî-geşt ü güzâr eyleyerek Sivas kurbünde "Köprübaşı" nâm mahalde gümâştegân-ı devlet ‘ale's-seher müşârûn ileyhi basup, kârını itmâm ve efsâne-i ‘ömrünü karîn-i encâm eylediler. Müşârûn ileyh nâyil-i tûğ u ‘alem oladdan berü Devlet-i 'aliyye'nin cüz'ü küllî bir işine yaramayup, vardığı memleketlerde zulm ü teʻaddî ile vedîʻa-i Hakk olan 'ibâdı giriftâr-ı çârmîh-i şikence vü iztirâb ve kasabât u kurâyı ber-hemzede-i inkılâb edüp, ‘âkıbetü'l-emr te'sîr-i âh u enîn-i zuʻafâ ile hakkında mücâzât-ı İlâhîyye zuhûr eyledi.