Beyne'd-devleteyn terk-i cidâl ü kifâh ve vukū‘-ı sulh u salâh ‘akabinde yek-dîgere hedâyâ ve süferâ irsâliyle te’kîd-i merâyir-i muhâdenet resm-i dîrîn ve kāʻide-i pîşîn olduğuna binâʼen, Devlet-i [170a] ‘aliyye tarafından taʻyîn olunun Sefîr-i kebîr vâsıl-ı re's-i hudûd ve Rûsiyyelü'nün dahi Büyük Elçisi karşu tarafa vürûd etmekle mübadeleye meʼmûr Bender Muhafızı Vezîr Hasan Paşa mükemmel kapusu halkıyla hâzır olduğu hâlde Tumbasar muzâfatından Kurlan Karyesi pîş-gâhında işbu Zilka de'nin beşinci sebt günü emr-i mübadele itmâm olunduğu haberi sâmia-res-i Devlet-i ebed-kıyâm oldukda mukaddemâ Elçi-yi mesfûrun mahall-i mübadeleden Âsitâne'ye gelince lâzım gelen mesârifi nakden Hazîne-i “âmire'den verilüp, Dergâh-1 'âlî kapucu-başılarının kâr-güzâr ve dirâyet-i ‘akl ile şöhret-şi‘ârlarından ‘Ömer Paşa-zâde 'Abdullah Bey Mihmândâr taʻyîn olunup, Mîr-i mîrân'dan İsmaʻîl Paşa dahi elçiyi muhafaza eyleyerek Âsitâne-i saʻâdet'e îsâl etmek üzere me'mûr olmuşidi. ‘Alâ- vechi'l-ihtimâm îfâ-yı me'mûriyyete kıyâm eylemeleri husūsu bu defa dahi mûmâ ileyhimâya tenbîh ü ifhâm olundu.