Belgrad Muhafızı Vezîr Ahmed Paşa dest-yârî-yi himem-i Şehriyâr-ı kişver-güşâ ile Belgrad'da ictimâʻ eden haşerât-ı nâsı def ve bu sebeble sâhib-i iʻtibâr u vak‘ olduğundan gayri, dâyiresinde kesret ve hâlinde ‘adem-i vüsʻat takrîbi ile [171b] Sancağı mansıb-ı aslîsine ilhâk ve manzûr-ı ‘inâyet-i Şehriyâr-i âfâk olup, bu mürû'et ü merhamete nazâran vâridât-ı muʻayyeneye kanâʻat ve şâ'ibe-i hırs u tama‘dan mücânebet eylemesi meʼmûl iken, bu esnâda reʻâyâ-yı Belgrad'a itâle-i dest-i teʻaddî ve baʻzı kimesneleri tecrîm ü ızrâra tesâddî eylediği mesmû‘ olup, derhal taraf-ı hazret-i Sadâret-penâhî'den müşârûn ileyhe bir kıtʻa mü’ekked kāyime tahrîr ve şüyû‘ bulan mezâlimden tahzîr olunup, kāyime-i hazret-i Asafî müşârûn ileyhin yedine vâsıl olduğu gibi zulm u teʻaddîden bi'l-külliyye dâmen-keş ve havf u haşyetden zihni müşevveş olup, bu hâl ile umûrunda mütekāsır ve giderek ‘ârıza-i ihtilâl-i serhadd vukūʻu ezhâna mütebâdir olmağla, ‘azli iktizâ ve mahall-i âhardan bir vezîr celb olunduğu hâlde müceddeden reʻâyâ-yı Belgrad mesârif-i külliyyeye mübtelâ olacağları zâhir ü hüveydâ olup, Belgrad'ın neferâtını müceddeden tertîb ve Kapudânlığa müteʻallik husûsları ıslâh u tanzîm ile memleket mesârifine nezâret ve fukarâyı himâyet 'unvânıyla Filibe Aʻyânı Mustafa Ağa'nın Belgrad'a me'mûriyyeti mukaddemâ tasvîb olunmuşidi. Mûmâ ileyh Belgrad'a vardıkda hıdemât-ı me'mûresinde izhar-ı saʻy-i bî-kıyâs ve vazʻ u hareketinde 'alâmet-i tevfîk ihsâs olunduğundan gayri, mesmûʻ u muhakkak olan hüsn-i sülûk u müʻâşereti ve ‘an-asl reʻâyâ-perverlik ile idâre-i memlekete kudreti hasebiyle bâ-rütbe-i Mîr-i Mîrânî Belgrad Muhâfızlığı eğerçi birkaç gün mukaddem tarafına tevcîh olunup, ancak Belgrad müntehâ-yı hudûd-ı İslâmiyye'de vâkiʻ bir hısn-ı menî olduğuna bina'en, vüzerâ-yı [172a] ‘izâmdan hulüvvü münasib görülmeyüp, mûmâ ileyhin terfî'-i şânı lâzım gelmekle hakkında kulzüm-i zehhâr-ı ‘inâyet-i Şehriyârî-yi mevc-engîz zuhûr ve işbu Zilhicce'nin üçüncü Cumʻa günü rütbe-i vâlâ-yı Vezâret'le nevâ-sâz-ı bezm-i sürûr olup, selefi Ahmed Paşa mansıbı olan Tırhala'ya ‘azîmet etmek üzere me'mûr ve ol bâbda ısdâr-ı menşûr kılınmışken, baʻzı eşkıyâ teftîşi ve mevadd-ı âhar tanzîmi mülâhazalarıyla Nîş'de ikāmeti irâde ve tarafına emr-i dîger firistâde olundu.