Muʻteberât-ı kütüb-i muhaddisînde nakş-pezîr-i harîr-i tahrîrdir ki, Kasîde-i Bürde sahibi Kaʻb bin Züheyr ve birâderi Büceyr bin Züheyr bi'l-mürâfaka "Abrak" nâm mevziʻa vürûd ve Büceyr münferiden Huzûr-ı Nebevî'ye duhûl ile nâyil-i hidâyet-i maʻbûd olduğunu birâderi Ka‘b istimâʻ eyledikde, Büceyr'i taʻyîb ve birkaç beyit inşâdıyla iltizâm-ı tarîka-i serzeniş ü tesrîb eylediği sâmia-zed-i Sultânü'l-enbiyâ oldukda, verd-i tarî-yi bâğ-ı melâhat olan hadd-i nâzikterînleri tâb-yâfte-i ihmirâr ve der-ân-sâʻat Ka‘b'ın hûnını ihdâr buyurdular. Büceyr ber-muktezâ-yı galeyân-ı dem-i şefekat-ı uhuvvet birâderi Ka‘b'ı vâkıf-ı hâl ü keyfiyyet eyledikde, Ka‘b'ın hâli perîşân ve hemân o ânda câ-yı me'men ‘add eylediği mahalle girîzân olup, bir müddetden sonra Fahr-ı ‘Âlem ve Habîb-i Ekrem hazretleri tîh-i dalâletde güm-kerde-râh-ı reşâd olanlardan her kim tâlib-i sülûk-ı muhaccetü'l-hak-ı İslâm olmağa hâhiş-ker olur ise, sahîfe-i cürmüne [161b] keşîde-i kalem-i ‘afv u igmâz ve eyyâm-ı câhiliyyetde sâdır olan tavr-ı küstâhı ve tabi'âtından i'râz olunur kelâm dürrü'l-insicâmı ile tevsî'-i dâyire-i dâ‘vet buyurduklarını ecille-i ashâb-ı güzîn, nakş-ı sahîfe-i yakîn buyurduklarında tâlib-i hâyr olan Büceyr bin Züheyr fi'l-hâl birâderi Ka‘b'a irsâl-i peyâm ve zuhûr-ı mübeşşirât-ı ‘afvı ifhâm eyledikde, bir müddetden berü felevât-ı hayratda sergerdân u hâyim olan Ka‘b-ı nâ-kâm bu peyâm-ı dil-efrûzdan nükhet-i necât u felâh-ı istişmâm edüp, süvâr-ı matıyye-i isti‘câl ve mütelessimen kadem-i muhterem-i Hazret-i Nebevî'ye ruhsây-ı tazarru' u ibtihâl olup, kabûl-i İslâm 'akabinde ref-i lisâm ve beyne'l-enâm Bürde ismiyle meşhûr u benâm olan kasîde-i garrâsını irticâlen inşâd eyledikde, rencûrân-ı cehâlete devâ-sâz-ı reşâd olan Habîb-i Rabbü'l-'ibâd hazretleri kasîde-i mezkûreyi istimâʻa agāz ve kāmet-i tûbâ-imtiyazlarını karîn-i temâyül ü ihtizâz buyurduklarından gayri, nûr-ı mücessem-vücûd-i muhteremlerine melâmis ü mahrem olan bürde-i saʻâdeti kemâl-i inbisâtlardan nâşî dûş-i Ka'b'a ilbâs ile manzûr-ı çeşm-i ‘izzet ve kasâyid-i gayr-i münkereye sılât u 'atâyâyı sünnet buyurdukları sübût-yâfte-i sıhhat-i rivâyet olup, Ka'b bin Züheyr ol genc-i şayegân ile her dem ü ân müftehir ü hizlân ve baʻde-bürhetin mine'z-zemân [Ebî] Mu'âviye bin Süfyân tarafından iştirâsı kasd olunup, kati çok meblağ ‘arz olunmuşiken, aʻrâz-ı zâyileye ‘adem-i iʻtibâr ile 'b'dan sûret-i aʻrâz nümâyân olmuşidi. Ba'de vefâtihi oğlundan girân-behâ ile oll dürr-i ‘akīleyi hazret-i Muʻâviye iştirâ ve aʻyâd u mevâsim-i müteʻayyinede teberrüken iktisâ ve ahlâfı dahi kendüye iktidâ edüp, [162a] tedavül-i eyâdî ile mülûk-ı Çerâkise'ye intikāl ve ‘âkībetü'l-emr sâyir tuhaf u nevâdir-i 'adîmü'l-misâl ile Devlet-i ‘Osmâniyye'ye sermâye-i ‘izz ü ikbâl oldu.