Mahrûse-i Konya'da gunûde-i pister-i zarîh ve dâr-ı ‘ukbâda müşâhede-i en'um-i Rabbaniye ile mütenaʻim ü müsterîh olup, "el-Mü'minûne lâ-yemûtûne bel yunkalûne min-dâri'lfenâ'i ilâ dâri'lbekā 'i" mefhûmuna mazhar ve işâret-i "E-lâ inne-evliyâʼellâhi lâ-havfun ‘aleyhim velâhüm yehzenûn" ile mübeşşir olan bahr-ı zehhâr-ı ‘ulûm, yaʻnî Monlâ-yı Rûm hazretlerinin kisve-i sandûka-i şerîfeleri köhne vü bâlî ve hamâ'-i himâyetlerinde mustazıll olan ‘azîzân u yârânın kezâlik setâyir-i merâkıd-ı şerîfeleri halik u fersûde olduğu baʻzı ecille-i nâs vâsıtalarıyla maʻrûz-ı Dergâh-ı ‘âlî kılınmışidi. Çünki ol Gavs-ı zemân ve Kutb-ı devrânın ‘an-asl habb-i hubb u velâları kişt-zâr-ı ihlâs olan sâha-i zamîr-i Şehriyârî'de hûşe-gîr-i istikrâr ve bu vesîle-i cemîle ile şâmilü'l-aktâr olan rûhâniyyet-i bākiyetü'l-âsârlarından hisse-mend-i niʻmet-i bürûmendi olmak arzusu semîr-i hâtır-ı lâmi‘ü'l-envârları olmuşidi. Fi'l-hâl zikr olunan merâkıd-ı müteberrekenin pûşîdeleri tecdîd ve ‘atîkleri Hazîne-i hümâyûn'da hifz u tahlîd olunmak üzere emr-i hümâyûnları şeref-rîz-i sudûr ve bu hıdmet-i pür-meymenete hâlâ Şehremîni bulunan es-Seyyid Mehmed Efendi me'mûr olup, atlas üzerine zerrîn-târ ile âyât ü esmâ nesc ü nakş olunmuş bir pûşîde-i [159a] girân-behâ ve ser-feyz-i eserlerin tagtiye içün bir kıt'a kisve-i bî-hemtâ ve Asitâne-i saʻâdet-âşîyânelerine âvîze olunmak üzere cevânibi Leh-kârî şerîd ile muhât atlas-ı dü-rengden ihtiyât olunmuş bir kıtʻa perde-i bâb destyârî-yi erbâb-ı sanʻat ve meded-kârî-yi ashâb-ı tabîʻat ile fî-akrebi'l-vakt husûl-yâb olduğundan gayri, cevânib-i hatîre-i bihişt misâllerinde müttekî ve sâyid-i mağfiret olan ‘azîzân-ı tarîkatin merkadlerine iksâ olunmak içün elvân atlasdan on bir kıtʻa setâyir i'mâl ü ikmâl ve Serây-1 'atîk teberdârlarından biriyle Konya'ya irsâl olunup, mesârifi on bin guruşa bâliğ olduğu sikât-ı sahîhatü'l-kelimâtdan mesmûʻ ve meblağ-ı mezkûr Hudâvendigâr-ı esbak ve müstağrak-ı deryâ-yı rahmet-i Hakk olan Sultân Mustafâ merhûmun fazla-i vakf-1 şerîfinden masrûf u medfû olup, Pâdişâh-ı mağfûr'a bu ganîmet-i hâssadan hisse-i gāyib ifrâz ve ruhâniyyet-i hazret-i Mevlânâ'dan münbaʻis-i imdâd feyz-i maʻnevî ile rûh-ı mutahharları iʻzâz olundu. Pâdişâh-1 sâff-itikād ve Hıdîv-i 'âlî-nejad hazretlerinin kasd-1 hürmet ile zarâyih-i evliyâya sarf eylediği himmetin karîben müşâhede-i âsâr u berekâtıyla mu‘dilât-ı umûr-ı devletleri meysûr ve herze-gerd-i vâdî-yi fiten ü şûr olan bed-hâhları pây-mâl-i senâbikü'l-hayl-i kahremanîleri olmak ehass-1 me'mûl-ı erbâb-ı kulûb u şu'ûrdur.