Şehr-i mezkûr hılâlinde tavâyif-i ‘askeriyyenin kısteyn mevâcibi ihrâc olunup, Kubbealtı'nda kabzına me'mûr olanlara teslîm ve Arslan-hâne kurbünde vâki' dükkânda mukīm ve kefere devletlerinden birinin zîr-livâ-i menkûsunda mahmî olarak zu‘munca muʻâf geçinen bir kebr-i zenîm fevâhiş-i nisvândan birinin hânesinde basılup, ikisi birden Barmak Kapu'da salb u ber-dâr ve lâzıme-i siyâset ile gayret-i İslâmiyye izhâr olundu. Humbaracı ve Lağımcı ocağlarına müteʻayyinân-ı Devlet-i ‘aliyye'den birer ağa nasb ve mikdâr-ı vâfî meʻâş ile ‘ârıza-i zarûretleri selb olunmak ocağlarına hürmet ve bekā-yı nizâmlarına ‘illet olacağı zâhir olmağla Dergâh-ı ‘âlî kapucu-başılarından sabıkā Silahdâr Ağası Kethudâ [158b] Ahmed Ağa senevî on beş kîse meʻâş ile Humbaracı Ocağı'na ve Dergâh-ı ‘âlî gediklülerinden Mehmed Emîn Ağa senevî on kîse meʻâş ile Lağımcı Ocağı'na Ağa nasb olunup, şehr-i mezkûrun yigirmi üçüncü günü ilbâs-ı hil'at ile taltîf ve kānûn-nâme mûcebince idare-i umûr etmeleri tenbîhâtıyla sâmi‘a-i izʻânları teşnîf olundu.