Kethudâ-yı Sadr-ı ‘alî olan İbrâhîm Efendi'nin egerçi ‘akl u zekâsı müsellem ve sadâkat ü istikāmeti gayr-i mübhem olup, ancak bu esnâda mübtelâ olduğu sû-i mizâc muhtâc-ı müdâvât u ‘ilâc olup, bir müddet [158a] visâde-i istirâhate tevessüd ve tedbîr-i vücûd ile tekayyüd eylemesi irâde buyurulup, işbu Şa‘bânü'l-muʻazzamın yigirmi üçüncü günü Efendi-yi mûmâ ileyh hıdmet-i mezkûreden munfasıl ve tedbîr-i vücûd ile müştagil oldu. Defter Emîni el-Hâc Mehmed Hakkı Beyefendi'nin salâh u takvâ ile beyne'n- nâs iştihârı ve gavâmız-ı ahvâl-i düvele ıttılâ‘ u ihtibârı ve bâ-husûs me’mûr olduğu hıdemâtda icrâ-yı lâzıme-i sadâkat-kârî eylediği refte refte mevsûl-ı sâmi‘a-i hazret-i Tâcdârî olup, hakkında temennî-dâşt-ı ‘âlem olan hüsn-i teveccüh-i Şâhâne cilve-ger- i mücellâ-yı bürûz olup, yevm-i mezkûrda mükerreren Kethudâlık mesnedine pâ-nihâde-i ikbâl ve huzûr-ı Sadrı's-sudûr'da telebbüs-i ferve-i semmûr ile nâyil-i akse'l-gāye-i âmâl oldu. Mahlûl olan Defter Emâneti ile Cizye Muhâsebecisi olan Dürrî Efendi tatrîb ve Cizye Muhâsebesi'yle Râtib Bekir Efendi tatyîb olundu.