Kapudan-ı deryâ Vezîr Hüseyin Paşa'ya bundan akdem ‘akd olunan ‘ismetlü Esmâ Sultân-ı ‘aliyyetü'ş-şân hazretlerinin işbu Cumâdelûlâ'nın beşinci günü sûr-1 meymenet-nüşûrlarına [150a] mübâderet olunup, yevm-i mezkûrda kā‘ide-i Devlet ‘aliyye üzere cihâz alayı tertîb ü tanzîm ve Dîvânyolu'nda vâkiʻ mukaddemâ müşârun ileyhâ hazretlerine temlîk olunan serâya îsâl u takdîm olunduğunun ferdâsı ‘arûs alayı dahi kānûn-ı kadîm üzere nesak-sâz-ı intizâm ve bi'l-cümle erkân-ı devlet ve hademe-i Saltanat pîş-nigâh-ı gerdûne-i müşârun ileyhâda ferserân-ı hirâm olup, serây-ı bihişt-âsâlarına iskân ü ilmâm ve Sadriaʻzam-ı sâmî-makām ve sâyir huzûru mu‘tâd olan zevât-ı kirâm etʻime-i şehiyye ile itʻâm ve yevm-i Cumʻa Sâhib-kırân-ı zemân u İskender-devrân, Şehriyâr-ı bende-perver ve Hakān-ı marzıyyü'l-eser hazretleri resm-i tehniyeyi icrâ içün serây-ı müşârun ileyhâyı teşrîf ü ahşâma dek mahall-i mezkûrda çâr-bâliş-nişîn-i arâm olup, ‘arûs u şevheri tensûkāt-ı Şâhâne ile taltîf buyurdular.