Hengâm-ı esfâr ‘akabinde Rumeli'nin ihtilâli umûr-ı ‘âdiyeden olduğuna binâ'en dağlı eşkıyâsı bir tarafdan ve Deliorman bâgīleri bir cânibden fukarâyı pâ-zede-i hasâr eyledikleri resîde-i derece-i iştihâr olup, istîsâl ü i‘dâmları ile reʻâyâ-yı za‘îfetü'l-eyâdî irâha ve mezâlim ü mefâsidlerin izâha, ‘adl ü dâd iktizâsından olduğu nezd-i hazret-i Hilâfet-penâhî'de meczûm ve sâhib-i kudret bir vezîrin bu hatb-ı vâcibü'l-ihtimâma meʼmûriyyeti beyne'l-lüzûm olup, Zihneli Vezîr Hasan Paşa Rumeli ahvâline muttali‘ ve dâyire-i hâl ü mikneti müttesiʻ olmağla, def‘-i eşkıyâ ve te'mîn-i etrâf u enhâ şartıyla evâsıt-ı Cumâdelulâ'da Silistre [150b] Eyâleti ve Çirmen Sancağı müşârun ileyhe tevcîh ve suver-i me'mûriyyetini dîger emr-i 'alîde tarafına iş'âr u tenbîh olundu. Belgrad muhafazasına taʻyîn olunan Vezîr Mustafâ Paşa'nın vâridât-ı mansıbı nâçîz ve idâre-i umûr-ı zarûriyye eyleyemeyeceği maʻlûm-ı erbâb-ı fark u temyîz olduğuna binâ'en târîh-i mezkûrda Tırhala Sancağı'yla hemyân-i iktidarı leb-rîz olundu.