Rûsiyyelü yedinden istihlâs olunan [149a] Bender Kalʻası'nın binâsı lâzıme-i hâlden olduğuna binâ'en Yeniçeri bir zemândan berü Kethudâ Kâtibi olup Yeniçerî Ocağı'nın kâffe-i umûruna müte‘arrız ve bu sebeble kelân-terân-ı ocağ tarafına mütemahhız olan ‘Osmân Efendi mâl-dâr ve sâhib-i iktidar olmağla Ocağdan elini kat‘ ve Beytü'l-mâl'den cemʻ eylediği nükūdu mühimme-i devlete defʻ etmek mekāsıdıyla işbu Rebî'ü'l-evvel'in altıncı günü Bender Kal‘ası'nın irâde-i devlet üzere binâsına Emîn ve lutfen zümre-i hâcegâna ilhâk ile kâmbîn kılındı. Yevm-i mezkûrda Ayvânsaray ve Beyoğlu'nda harîk vukūʻ bulup, destyârî-yi fazl-ı Bârî ile zarar küllî olmadan münhamid oldu. Burusa ve Gelibolu'da ‘alâ tarîkı'n-nefy mukīm ve muntazır-ı ‘afv-ı Şehriyâr-ı vâcibü't-taʻzîm olan sâbıkā Ordu Kadısı Keçeci-zâde Sâlih Efendi ve Kādî-yı sabık Cevdet Efendi ve Monlâcık-zâde Ahmed Efendi mazhar-ı safh-ı Şehinşâh-ı afâk ve üçü birden ni'met-i ıtlâk ile dil-sîr-i merhamet ü eşfâk oldu. Mâh-ı merkūmun on ikinci günü bi'l-cümle erkân-ı devlet ve esâtîn-i saltanat-ı Sultân Ahmed Hân Câmiʻi'nde ictimâʻ edüp, mu‘tâd olan alay ile Şehriyâr-ı İskender-vakār, semend-i dil-bend-i haşmet ü mehâbet-süvâr, mefârik-i ahlâk-ı pîşe-gân-ı 'ibâda tal'at-ı âftâb-âsârlarıyla lâmi‘ü'l-envâr olup, kırâʼat-ı Mevlid-i Nebevî ile gûş-dâde-i ahbâr-ı Seyyidü'l-ebrâr olan huzzâr mâlik-i nisâb-ı meymenet ve şîrîn-mezâk-ı şerbet-i hayr u bereket oldular. Cebeci-başı Tosun Ağa maʻzûl ağalar hakkında siʻâyet ve hıfz-ı câh takrîbi ile merkūmları serdâde-i vâdî-yi gurbet [mısra]‘: Tô bed-konende hod-râ be-gerd-kâr-ı sipâr. deyerek her biri bir semte ‘azîmet etmişidi. Agrâz-ı dünyeviyye [149b] icrâsıyla zu'afâ-yı nâsı izrâr edenler esbâb-ı küdûrâtın biriyle mütekeddir olmak sünnet-i İlâhiyye'den olduğuna binâ'en, Ağa-yı mûmâ ileyh rûh-ı izâfîsi gibi hıfz eylediği ağalıkdan şehr-i merkūm'un on yedinci günü matrûd u mehcûr ve ümmîd etmediği Baş-kethudâ Cebeci-başılık ile mesrûr oldu. Mîr-i mîrân-ı kirâmdan Kürd Ahmed Paşa ve Arnabud Tâhir Paşa hakkında merhamet-i Mülûkâne zuhûr edüp, Ahmed Paşa Remo Sancağı'yla cezlân ve Tâhir Paşa Akşehir Sancağı'yla fâyikü'l-akrân oldu. “Uşşâk Voyvodası olup, cerâyim-i sâbıkasına mücâzâten istîsâl ü i‘dâmı irâde buyurulan ‘Acemoğlu üzerine Anadolu Vâlîsi Vezîr ‘Ali Paşa meʼmûr olmuşidi. Şakī-yi merkūm haberdar olup, fî'l-hâl matıyye-rân-ı firâr ve tâfte-rû-yı idbâr olmağla, mecmû‘-1 emvâl ü eşyâsı cânib-i mîrîyçün zabt olunduğu haberi Vezîr-i müşârun ileyh tarafından işʻâr olundu. Sâbıkā İzmir Kādîsı Tâhir Efendi, Hamîdî-zâde Şeyhulislâm iken müfettişi bulunup: "Baʻzı mekârihde eli ve nefy ü tagrîb kazıyyelerinde medhali vardır" deyü inhâ ve mûmâ ileyh ‘an-asl bir şahs-ı elûf olup, ekâbirân-ı devlet ile mânend-i şîr ü şekker ihtilât ve ‘ale't-tevâlî ziyâret-i eʻâlî eylediği mûcib-i iştibâh u ihtibât ve: "Hamîdî-zâde'nin ıtlâkına saʻy üzeredir" deyü pâ-y-i râhatına isâʼet-kârân-ı vakt riște-i pîç-ender-pîç sû-i zann-ı irtibât eylediklerine binâ'en şehr-i Rebîʻulâhır'ın yigirminci günü Kastamonu'ya iclâ ve nevâyib-i gurbete mübtelâ oldu.