Mültezim gürûhundan Arnabud Ahmed nam şakī adalar arasında geşt ve fursat buldukça baʻzı kimseleri pâ-beste-i hibâle-i şest edüp, mâllarını ahz u gasb ve baʻdehû câme-i hayatların selb eylediği ve bu esnâda Yalakabad sahilinde tâyife-i tüccardan beş on nefer zimmînin kayıklarında der-hâb ve mest-i şarâb oldukları tahkīk ve fî'l-hâl mesfûrların başlarını balta ile bedenlerinden tefrîk edüp, mevcûd olan emval ü eşyalarını ahz ve ihtifâ ve bu hâdise giderek karʻ-ı sâmiʻa-i evliyâ-yı niʻamâ edüp, bi- eyyi hâl ele getürülmesi irâde buyurulduğuna binâ'en taraf taraf hasekîler taʻyîn ü tahsîs ve me'mûr olan hasekîlerden biri şakī-yi merkūmu Kartal kahvelerinin birinde teşhîs edüp, Kartal Subaşısı'na ifâde-i hâl ve şakī-yi merkūm ile dokuz nefer rüfekāsını mukayyed-i ağlâl-i nekâl ve Âsitâne-i saʻâdet'e îsâl etmeleriyle üç neferi mecbûren maʻiyyet eyledikleri aşikâr olduğundan kürege vazʻ ve beş neferi meslûb u berdâr ve Mültezim-i merkūm dahi Serây meydânında ser-bürîde-i tîg-i hûnbâr ve mûceb-i ‘ibret-i şekāvetkârân-ı rüzgâr oldu.