Kapudân-ı deryâ Vezîr Hüseyin Paşa Akdeniz'de ser-ber-âverde-i iştihâr ve bâdbân-güşâ-yı zarar u hasâr olan Lambro nâm laʻîni ve hevâdârı olan müşrikîni bâlâda tafsîl olunduğu vech üzere mahzâ meyâmin-i himmet-i Pâdişâhî ile îsâl-i derece-i izmihlâl ü tebâhî edüp, Bahr-ı sefîd'i tasfiye ve korsan tâyifesinden tahliye ile rûz mesâfede mazbût-ı dest-i dilâverân olan on beş kıtʻa kebîr ü sagīr sefîneleri fitrâk-beste-i ganîmet ve "Karakaçan" dedikleri kebr-i sitabr ile yedi nefer sergerde-i eşkıyâ-yı kefereyi kendi sefînelerinin cundalarında salb ile icrâ-yı lâzıme-i siyaset eyleyerek işbu Saferü'l-hayr'ın on ikinci günü Yalıköşkü pî-gâhından mürûr ve ʻalâ mâ-cera'l-ʻâde Yalıköşkü'ne çıkup, hâk-i kadem-i Şehriyârî'yi çeşm-i iftihârına kühlü'l-cevâhir-i sürûr eyledikde muʻtâd olan hilʻat-i zâhireden başka zât-ı şürûşu sıfât-ı Şâhâne'ye muhtass olan kürklerden penbe şâla dûhte bir sevb-i semmûr ilbâs ve neferât-ı donanma yüz bin guruş ʻatıyye-i behiyye ile mazhar-ı nevâziş ü istînâs kılınub, mukayyed ü mağlûl olan küffârın ve resen ü dârâ ile dûzah-peymâ olan eşrârın libâslarında Moskovlu'ya mahsûs baʻzı [147b] ʻalâyim meşhûd ve Maslahatgüzâr bu mâdde içün hayli kīl ü kāl eyleyerek rişte-i münakaşayı memdûh edüp, cevâb-ı bâ-savâb ile ilzâm ve esb-i harûn-ı ruʻûnet-i faslü'l-hitâb ile ilcâm olundu.