Muhzır Yazıcılığı'ndan neş'et eden Saʻîd Ağa sefer evâhırında Segbân-başı bulunup, ‘avâm-pesend hareketi sebeb-i manzûriyeti olmuşidi. Ordu-yi hümâyûn Âsitâne'ye geldikden sonra Devlet-i ‘âliyye'ye nâfi‘ hidemât irâdesiyle Ağa-yı mûmâ ileyh Yeniçerî Ağası nasb u taʻyîn ve fart-ı nazar-ı İksîr-eser'den nâşî bir defâ miyân-ı iftihârı sikkîn-i mücevher ile tezyîn olunmuşidi. Ancak mûmâ ileyh tarîk-i Bektâşiyye'nin Hamîdî-zâdesi olup, ednâ-yı behâne ile bir hâneyi vîrâne eylediğindenden gayri yevmen-fe-yevmen ‘azlü tebdîl ile cem‘-i emvâl ve emekdârân-ı Ocağın kati çoğunu müsâderât-ı pey-der-pey ile pâ-beste-i kayd-ı ibtizâl ve Anapa'ya ‘amele irsâli irâde olunup, bu vesîle ile kati çok bî-çâreleri tecrîm ve ‘ameleden sâkıt olanları sevk ü tahzîm edüp, cevr ü zulmü eslâfından birkaç kat efzûn [147a] olduğundan kat‘-ı nazar-ı tenâvül-i akdâh-ı râha bi't-tab‘ meftûn ve bâ-husûs sevdâ-yı sâde-rûyân ile sebak-hân-ı mekteb-i cünûn olup, bu hâl ile umûrunda gayr-i muvaffak ve vaktinde ‘âle't-teʻâkub ihrâk zuhûruyla şeâ'met-i kademi muhakkak olmağla mâh-ı mezkûrun yigirimi yedinci günü Ağa-yı mûmâ ileyh ʻazl ve Dimetoka'ya ibʻâd ve Kul Kethûdâsı Mustafâ Ağa mansıb-ı mezkûr ile dil-şâd kılındı.