Bu mahalle gelince Enverî Efendi ve Edîb Efendi'nin zabt eyledikleri vekāyi‘ müceddeden kaleme alınup, me'mûrriyet-i ‘Âcizânem'e gelince zabt olunmayup, mühmelen terk olunan bir senelik vekâyi dahi lede't-tetebbuʻ ve'l-istikrâ inşâʼallâhü Te‘âlâ vâsıta-i kalem-i dü-zebân ile nakş-ı sahîfe-i beyân ve ma‘rûz-ı Âstân-ı felek-bünyân kılınır. Cenâb-ı nesak-tırâzende-i ekvân ve zînet-bahşende-i zemîn ü âsumân, nahl-ı revân-ı sûr-sitân-ı devlet ü ikbâl olan vücûd-ı ‘alem-sûd-ı Mülûkâne'yi mede'l-eyyâm kāmet-efrâz-ı devâm eyleyüp, bi'l-vekâleti'l-mutlaka zimâm-ı umûr-ı enâm müsellem-i dest-i kifâyeti olan Sadrıa‘zam-ı vâlâ-makāmını dahi rızâ-yı [142b] Hakk'a muvâfık ve irâde-i Mülûkânesine mutâbık a‘mâl-i hayriyyeye muvaffak ede, Amîn!