Çıldır Vâlîsi Süleymân Paşa'nın câme-i hayâtı bâlî ve İshak Paşa hafîdi İshak Bey Vezâret'le eyâlet-i Çıldır'a Vâlî olmuşidi. Müşârun ileyh tavr-ı beldeden hâric evzâʻa ibtidâr ve lede'l-hâce istihdâm içün eslâfı misillü Lezgî tâyifesinden segbân celb etmeyüp, Tiflis tarafından segbân tedârük ve ehl-i İslâm'a teslît edüb, mugāyeret-i diyânet lâzımesince bu vaz‘-ı nâ-hemvâr ehâlîye girân gelüp, Çıldır'a karîb mahalde mütemekkin Süleymân Paşa-zâde Şerîf Mehmed Bey'e müncezib ü mütemâyil olmalarıyla, miyânelerinde rüsul ü resâyil mütekerrir olduğunu İshak Paşa ihsâs ile Mehmed Bey hakkında gayz u gazabı müstekarr olup, ahadühümâ âhara serzeniş ü 'itâb ve giderek muʻâtebeleri muhârebeyi îcâb edüp, Çıldır ‘askeriyle Kethudâsını Mehmed Bey üzerine taʻyîn ve mîr-i merkūm dahi Lezgî tâyifesinden muhafaza-i nefs içün celb eylediği ‘asker ile istikbâl ve izhâr-ı kîn ve miyânede henüz âsiyâb-ı harb idâre olunur iken, İshak Paşa [142a] Kethudâsı'nın maʻiyyetinde olan Çıldır ‘askeri tıbk-ı mukāvele üzere Şerîf Mehmed Bey tarafına geçüp, yek-laht-ı ittihâd olarak öte tarafın segbânlarını istîsâl ve Şerîf Bey'i alup, Ahısha'ya idhâl esnâsında İshak Paşa firâr ve bir mahalde ‘adem-i karâr bi'z-zarûre Erzurum'a varup, vukūʻ bulan keyfiyyeti Devlet-i ebediyyü'l-istimrâr'a işʻâr eyledi. Ehâlî-yi Çıldır ise bi't-tab‘ ve'r-rıza Şerîf Mehmed Bey'e münkād ve Vâlî-yi memleket olması bâbında râbıta-bend-i ittihâd olup, Devlet-i 'aliyye'ye recâ-nâme irsâl ve İshak Paşa'nın vaz‘-1 nâ-hemvâr ve zulm-i bî-şümârını tafsîl ü icmâl etmeleriyle, ehaff-ı şerr ihtiyâr olunarak niyâzları müsâʻade-i Cihândârî'ye makrûn ve Şerîf Mehmed Bey'e rütbe-i vâlâ-yı Vezâret'le Çıldır Eyâleti verilüp, bu takrîb ile İshak Paşa'nın râyet-i bahtı ser-nigûn ve Erzurum'a karîb mahalde vâki olan Hasan Bey Kalʻası'nda merfû‘'ul-Vezâre ikāmetle dil-rîş-i tâli‘-i vârûn oldu.