Selâtîn-i Çingîziyye'nin Rumeli memâlikinde olan zulm ü teʻaddîleri ve fukarâ-yı zuʻafâya olan mazarrat u hasâretleri muhtâc-ı beyân olmadığından başka, dâyireleri makarr-ı lüsûs u düzdân ve çiftlikleri dârü'l-emân-ı sitemkârân-ı zemân olup, nüvvâb u hükkâm tasallutlarından ‘âciz ü bîzâr ve ilkā-yı raht-ı sıklet eyledikleri Devlet-i ‘aliyye'ye cüz'î ü küllî fâyideleri olmayup, zararları derkâr ve müteʻayyinlerinin vâhiden baʻde vahid nefy ü iclâlarıyla memâlik-i Pâdişâhî'yi tasfiye ü tathîr karâr-gîr-i uli'l-ebsâr olup, binâ’en-‘alâ-zâlik hâlâ Kuban Hânı olan Baht Giray Hân benî nevʻinin nâmdârı ve usûl-i Çingiziyye'nin fer‘-i şöhret-și‘ârı olup, işbu seferde mâl-ı ferâvân tarafına ihsân olunmuşiken, dîn ü devlete nâfi' bir hıdmete muvaffak olmadığından, hakkında zülâl-i sâf-meşreb-i Tâcdârî mütegayyer ve karâr bulan maslahata müşârun ileyhden bed' ü mübâşeret olunmak zihn-i pâk-ı Şehriyârî'de mütekarrir olmağla baʻzı umûr iştişâresi zımnında Asitâne'ye da'vet ve birkaç gün resm-i mihmân-nüvâzîye riʻâyet olundukdan sonra, bir kere istikșâf-ı hâl ve istitlâ‘-1 mâ fî'l-bâl iltizâmıyla sâhil-serây-ı Bebek'de hâvass-ı Devlet ile ‘akd-1 encümen-i meşveret olunup, Hân-ı müşârun ileyh dahi dâhil-i halka-i cemʻiyyet olmuşidi. Umûr-ı mülkiyyeye dâyir ebvâb-ı mübâhese-küşâd ve taraf taraf tedbîr-i sakīm ü müstakîm îrâd olunduğu esnâda Hân-ı müşârun ileyh dahi baʻzı mümteni‘ât ahvâli zebân-âver-i makāll edüp, [140b] ruka’-i meclis vâsıl-ı dest-i Şâhâne oldukda, hakkında sû’-i zann mütezâyid ve niyyet-i sâbıka müte'ekkid olmağla, ibtidâ Midilli'ye ve ba‘dehû Girid Cezîresi'ne nefy ü iclâ ve birâderi Hâcı Girây dahi bir müddet mürûrundan sonra İstanköy Cezîresi'ne bi-tarîkı'n-nefy isrâ olunup, selâtîn-i merkūmeden ‘arzıyla mukayyed olmayup, izrâr-ı nâs şîme-i rezîlesiyle i'tiyâd edenlerin dahi ekserîsi bir adaya tagrîb ü irsâl ve levâhık ü tevâbi‘leri âsûde-nişîn-i pister-i emn ü emân zîr-destân misillü taht-ı tekâlîfe idhâl ile irgām-ı ünf-i nahvetlerine isti‘câl olundu.