Sadrıaʻzam ve bedr-i efham hazretlerine berîd-i sebük-mesîr-i beşâret resîde olup, üç günden sonra mersâ-yı Kandiye'den refʻ-i lenger-i ikāmet ve kaʻbetü'l-âmâl olan Âsitâne-i saʻâdet'e imâle-i sükkân-ı teveccüh ü ʻazîmet buyurup, Bodrum Kasabası'na vusûl ve menzile süvâr ve Aydın içinden sürʻat-i seyr ile Âsitâne'ye karîb mahallere vürûdları ihbârı teşnîf-sâz-ı sâmiʻa-i uli'l-iʻtibâr olduğuna binâ'en, daʻvetlerini mutazammın hatt-ı hümâyûn ile hâlâ Silahdâr-ı hazret-i Şehriyârî olan ʻAbdullah Ağa me'mûr buyurulup, Mudanya menzilinde tesâdüf ve hâmil olduğu hatt-ı şerîfi ibrâz ile dâʻîye-i şevk-i Sadâret-penâhî'yi karîn-i tezâʻuf edüp, Ağa-yı müşârun ileyh ʻavdet ve kāʻide-i Devlet-i ebedd-müddet üzere derhâl Bostâncı-başı sandalını ve vefâ edecek kadar merâkib-i bahriyyeyi Bostancılar Oda-başısı istishâ ve tahrîk-i mıkzâf-ı istiʻcâl ü şitâb edüp, Şevvâlü'l-mükerrem'in on yedinci Pençşenbih günü müşârun ileyh hazretleri Üsküdar'a kadem-nihâde-i vusûl ve mukaddemâ nasb u ferş olunan hıyâm-ı süreyyâ-nizâma nüzûl ve resm-i ziyafet icrâ ve ferdâsı 'ale's-seher Şeyhulislâm ve Kāyim-makām-ı benâm ve ‘ulemâ-yı a‘lâm ve erkân-ı Devlet-i ebedd-kıyâm istikbâl levâzımını îfâ ve tebrîk-i Sadâret-i ‘uzmâ eylediler. Şeyhulislâm [136b] Efendi ile sandala rükûb ve maʻan takbîl-i hâk-ı kadem-i hazret-i Tâcdârî'ye vüsûb ile isşart-ı vücûb eylediler. Müşârun ileyh taraf-ı Şâhâne'den nevâziş ü iltifâta mazhar ve hasret-keş-i vüzerâ-yı ‘izâm olan mühr-i hümâyûn ile muvakkar olup, serây-ı dil-ârâsını teşrîf ve hila‘-i ‘umûm ile erkân-ı devleti taltîf eyledi.